فى هجاء جمال الوالى

مناوشات شعريه للخروج من الرسميات

القصيدة المئوية فى هجاء جمال الوالى
عمار محمد ادم

منقول من سودانيزاون لاين
http://www.sudaneseonline.com/cgi-bi...msg=1250364955

الاستاذ عمار محمد ادم


بشتن للرياضة وجهجه كمان مريخنا
ليه تهزم فريقنا وتبصق على تاريخنا
شرباتنا الفريق سويتو انت فسيخنا
يا الوالى الكعب فرضوك زعيمنا وشيخنا


يا الوالى المخستك كيفن تخربو فريقنا
النار ولعت وبى سرعة زدت حريقنا
دايرين ننطلق ولابد تفكو طريقنا
يا زول الحكومة ما كغاية نشفوا ريقنا


عولقت الفريق وعولق معاهو لعيبة
لى هذا الفريق لابد تجيبها مصيبة
يا والى السجم كل خزلة انت تجيبها
ما تحل عن وجوهنا والله حاجة عجيبة


لو اسمك جمال يازول جمالك طاير
ضيعت الفريق جمهور ممحن وحائر
تاريخك كعب ونسدل عليهو ستائر
كان اعظم فريق ودارت عليهو دوائر


مريخنا البطل خليتو انت فطيسة
والماء الزلال يبقالنا نحن مريسه
يا الوالى الهزائم والله انت عريسها
يا الشيخ الكنائس ضاقت على قسيسها



لونا الاحمروقانى خليتو اغبشر وباهت
لونا الاصفر فاقع بقيتو اسود وغامت
ضيعت الفريق اسعدت حاقد وشامت
دايماترتجف ما شفنا حالك ثابت


رد من الاستاذ يوسف الموصلى

ياعمار اخوي سيبوهو داك الوالي
ابدا مابخل كان بي رخيص او غالي
ايه يعني اتغلب سيد الجناب العالي
ما كان منتصر سيد الفرح طوالي



للمريخ هداك الوالي فاتح جيب
دوما منتصر في لعبو راقي عجيب
لكن لو عتر ما ياهو علم الغيب
والتور ان وقع كتر البتابت عيب


وينو الصدق بازول ما تبقي بس ضرار
شن الفنجره باكر بتاكل النار
شن جاب التبش للغالي سيد الدار
اولاد الاسود ما فقعة الفوار

رد الاستاذ عمار محمد ادم


مبروك يا موصلى بكرة بتجيك قروش
تشبع وتتملى لامن تسوى كروش
يا زول الكلام الليلة دخل الحوش
والوالى السجم نديهو بالبرطوش



رد الاستاذ يوسف الموصلى
نحن ولاد بلد حشانا نبقي وحوش
مابغرينا زول بي كنز او بقروش
اولاد الاسود بكره بيجوكم توش
وداك زولنا الهصور مابتترمشلو رموش

رد من انور التكينه

المصيبة يا عمار ما فى ادارة نادى
لكن فى روح قتال ليها ديمة ننادى
الوالى سوا العليهو و فات بى غادى
بس تدريبنا تايه و الخطط فى وادى




خلى الضل هناك وواجه انت الفيل
و البنعرفو عن اخلاق والينا ماهو قليل
بنقولا كلمة حق خاتية من تطبيل
انجازات جمال ما محتاجة منى دليل



متمسكين بى فريقنا و دربنا لسه طويل
و بنصحح لى الخطأ و نمسك طريقنا عديل
نتماسك جميع و لى كل غلط بنزيل
و نجومنا بكره تلمع و تسمع التهليل


رد الاستاذ عمار محمد ادم
بس شوفوا التكينة الليلة اصبح شاعر
والزول ماتجم لا فيهو حس لا مشاعر
فى لم القروش ما انت فالح وشاطر
فيك اقصى الكرم تملانا شاى وسكاكر


رد من انور التكينه

انا ما تجم انا ود الفطانة الباينة
و شاعر من زمان بس ظروفى الخاينة


عمار انقرع خلى الكلام الفاضى
و ما تعمل خصم و مرة تعمل قاضى

ما طولة لسان احسن تراجع الماضى
و اعدل فى كلامك ابقى عنك راضى

يانى التكينة بتعرف مكارمى و جودى
و ما بتعدى على زولا افوتلو حدودى



رد الاستاذ عمار محمد ادم

شوف التكينة الشين الليلة مد لسانو
حالف انتقم واهدو من اركانو
يجمع فى القروش والبركة فى اعلانو
مسكون التكينة وظاهر عديل شيطانو



رد من انور التكينه

الله يجازى محنك عمار لسانك فالت
فايت لى الحطيئة و لى جرير بتغالت
فكيتو دربك و من مصايبك فايت
و من الليلة لا بفتح جهاز لا( سايت )