العودة   منتديات قرية عمارة ( البيت بيتك ) > القسم الثقافي الرياضي الإجتماعي > المنتدى الثقافي


آخر المشاركات المطروحة في منتديات قرية عمارة ( البيت بيتك ) .

  خواطر وذكريات ( المشاركة الأخيرة بواسطة : أنور محمدين ، عددالمشاركات : 436 ، عددالمشاهدات : 32137 )   « »   شيءٌ من الشِّعِر ... ( المشاركة الأخيرة بواسطة : Fawzi Salih Wahbi ، عددالمشاركات : 922 ، عددالمشاهدات : 52913 )   « »   يوميـــات عـــــــــزوز ( المشاركة الأخيرة بواسطة : امبروزو ، عددالمشاركات : 231 ، عددالمشاهدات : 24437 )   « »   هل حقاًُ تتطابق القضايا النوبية هنا وهناك ؟. ( المشاركة الأخيرة بواسطة : الحسن هاشم ، عددالمشاركات : 1 ، عددالمشاهدات : 43 )   « »   غناوي الشوق ... ( المشاركة الأخيرة بواسطة : Fawzi Salih Wahbi ، عددالمشاركات : 266 ، عددالمشاهدات : 21450 )   « »   لقاء الأحد ( المشاركة الأخيرة بواسطة : مموشى سيدا ، عددالمشاركات : 313 ، عددالمشاهدات : 18543 )   « »   في ذمة الله حمدي قرناص ( المشاركة الأخيرة بواسطة : bushra alzain ، عددالمشاركات : 3 ، عددالمشاهدات : 175 )   « »   ادخل المنتدي بذكر الله ( المشاركة الأخيرة بواسطة : amaratod ، عددالمشاركات : 13 ، عددالمشاهدات : 196 )   « »   صفحة للتبريكات والتهنئة ( المشاركة الأخيرة بواسطة : mubarak ، عددالمشاركات : 429 ، عددالمشاهدات : 45541 )   « »   مواقــف وحكايـات ( المشاركة الأخيرة بواسطة : amaratod ، عددالمشاركات : 228 ، عددالمشاهدات : 22004 )   « »  

اّخر الأخبار
أهلا وسهلا ومرحباً : غير مسجل تم بحمد الله ترقية المنتدى للنسخة الأخيرة المتطورة من الجيل الثالث 3.8.7 عن طريق الدعم الفني من شركة الاستضافة خلال اليوم مع تركيب هاكات جديدة أهمها هاك ( الأعضاء الذين شاركو اليوم ) وتجدونها أسفل المتواجدون خلال اليوم وذلك تشجيعاً للأعضاء للمشاركة كما تم تركيب هاكات اخرى للحماية ومنع سوء استخدام التسجيل في المنتدى ومنع التستجيل الاسم بالانجليزي والارقام وتكرار التسجيل باسماء وهمية وتم تركيب هاك جديد للاستفتاءات سيفعل قريبا وهاكات اخرى جاري تركيبها مع تمناياتنا بالتوفيق ،،،،،،،

الإهداءات

إضافة رد
 
أدوات الموضوع
قديم 21-11-2006, 11:12 AM رقم المشاركة : 1
افتراضي قطار الشوق

أحبتي الذين أزمعوا السفر على متن قطار الشوق الذي سيمضي بنا مسرعاً إلى محطات السفر هيا بنا لنسافر لبلاد الله ونسى الناس وينسونا وفوقنا الطيبة تدلى
هلموا بنا لنعيش ذي ما الطيور بتعيش وتفرد لي جناها الريش

وقبل الخوض في متاهات الطريق دعوني أيها الأحبة أهديكم كلمات أغنية البلابل الشهيرة التي إقتبست منها إسم البوست:

يا قطار الشوق متين نوصل
حبيبنا هناك تلاقينا
متين نحضن عويناتو
متين يرجع يحيينا
**** ***
قطار الشوق ده ليل الغربه
فيك ودار متين تسرع
متين نكمل المشوار
*** *****
عشان نلقى سيد الناس
و نطفي البينا من النار
و اشوف عينيه نعسانه
و لونو الزاهي كل نضار
***** **** **
يا قطار الشوق لو تعرف
غلاوة الريد كان بدرت في الميعاد
وكان جرت عجلاتك
و كان قللت ساعاتك
و كان حنيت علي مره
***** *****
يا قطار الشوق
ده حبيبنا هناك
بنحسب في مسافاتك

فكثيراً ما نجد أن سيرة الشوق قد وردت في الأغنيات السودانية العربية بشكل أو بآخر
شوق للأهل والصحبة وحب كل جميل في الحي وهنالك الأشواق التي تهش وتهتف لعيون الحبيبة
كما في رائعة الكابلي:
" يا شباب عمري المفتق
شلت كل الريد مشاعر حلوة نديانة وخصيبة
واشتهيت يهل وعدك لي هناء وافراح وطيبة
اه لو بتعرف كيف تهش اشواقنا تهتف لعيونك
كيف يلح الشوق ويسأل
كيف ترق اشواقنا ترمز لعيونك
كيف يغالي الشوق ويسأل

ونحن من خلف المدى الفرقنا طول لو بتعرف
نرسم الليل في البعاد جنة لقاء "
وهنالك من لا يطيق نار الشوق كما في رائعة ود الأمين:

" مشتاق ونار الشوق كيف ليها اقدر أطيق
كيف من همومي أفيق مدام وصالي عسير
بعيد عن الجنة
الليهو ديمة أحن
من شوفتو طولنا نهواه ما زلنا
نهواه رغم الجور رغم البعاد عنا"

أما أبهى صور الشوق نجد أنها تتجسد جلية
في تلك التي ينادي همسها ويقف كل الزمن ويسمع
كما في أغنية ود الأمين:

"بريدك .. كلمة كان رفت يهش ثغر النجوم ويسطع
ولما ينادي همس الشوق يقيف كل الزمن ويسمـع
عيونك ديل عيون أهلي حُنان زي نغمة في مقطـع"

وهل تصدقونني إن قلت لكم أن للشوق في الأغنية السودانية
مواسم وفصول تأملوا الشاعر الرقيق الحلنقي وهو يقول:
"هجرة عصافير الخريف
فى موسم الشوق الحلو
هيج رحيلا مع الغروب
احساس غلبنى اتحملو
وكتمت اشواق الحنين
داير الدموع يتقلو
ورجعت خليت الدموع
يناسبو منى وينزلو
ليه يا عصافير الخريف
خضرة مشاعرى اشيلا صيف"

وقف تأمل الغروب وهو يسأل في شوق بالغ
من أمسيات الحبيبين والرمال الناعمة مشتاقة
لمشي الحبيبة فوق حباتها
كما في أغنية عثمان مصطفى الخالدة:
" الخدود الشاربة من لون الشفق عند المغارب
ديل خدودك سيدي .. وسيد الناس .. يا سيد الحبايب
العيون طرتني زول من اهلو غايب
والشعر في كتيفو يتهادل سبايب
والله مشتاقين
في عينيك تظهر لي دنيا
دنيا شوقك فيها ظاهر
الاماني الحلوه هايمة زي بحور ما ليها آخر
الكليمة الطيبة منك زادي
وحياتك لي باكر
والامل فارد جانحو ديمة زي عينيك مسافر
والله مشتاقين
الغروب يسألني منك امسياتنا في شوق اليك
الرمال الناعمة مشتاقة لي مشيك
الطيور الراحلة في ظل المساء بتسال عليك
كيف تفارق الضفة والنيل هان عليك
والله مشتاقين
طال علينا فراقكم والله يا غايبين
قدر ما ننسي العلينا برضو مشتاقين
والله مشتاقين"

أما الفنان الراحل المقيم هاشم ميرغني فقد عاتب الحبيبة تارة
بأنها لم تعد تشتاق إليه
وأنه قد وجد أن اللهفة راحت كما في أغنية:
"يعني ما مشتاقة لي والله ما عارفة العلي
ما زمان قبال أسافر كان فراقي صعب عليك
وجيت لقيت اللهفة راحت وحتى عينيك ما عينيك"
في حين أنه يدعي العكس بأن الشوق لم ينطفئ لهيبه رغم البعاد
كما في رائعة الشاعر الكبير عزمي أحمد خليل:

" غيب وتعال .. تلقانا بنفس الايادى الراجفة
مشتاقة فى ساعة سلامك
غيب وتعال تلقانا بنفس القلوب الياما
حزنت لما فقدت ابتسامك"

أحبتي للحديث بقية وسوف يمضي قطار الشوق قدماً عبر محطات الأغنية النوبية أيضاً فترقبوني







رد مع اقتباس
قديم 21-11-2006, 11:14 AM رقم المشاركة : 2
افتراضي

أحبتي دعونا نواصل السرد في سيرة الشوق وعجبي لهذا الشوق الذي لم يسلم منه أحد ، حتى الأفلاك قد أخذت تشتاق أيضاً كبني البشر كما ورد في الأغنية الشهيرة:
" كل الأفلاك،، كانت يا ملاك، مشتاقة إليك
كام بدري عليك تودعني وأنا مشتاق ليك"

وقد إقترن الشوق في تناول آخر بلحظة معينة تثار فيها لواعج الشوق الكامنة كما في رائعة الفنان محمد مرغني:

" اشتقت ليك ساعة المساء فرد الجناح *** لملم مصابيح النهار
والعتمة نامت في الدروب ** والليل لبس أجمل وشاح
اشتقت ليك شوق السحابة الراحلة
في جوف الشتاء عطشانه تحلم بالخريف
وبقيت ضعيف
في اللحظة ديك مديت معابر شوقي ليك
وحنين حنيني الظامئ ليك
في اللحظة ديك اشتقت ليك واحتجت ليك "

وآخر قد إتخذ الشوق طريقاً يسلك دروبه إلى حيث لا رجعة:
كما في أغنية عبد العزيز المبارك الشهيرة:
" طريق الشوق مشيناه ،، وبحر الريد عبرناه
وقلنا مصيرنا يوم نرجع خيالك ما وصلناه
تطول يا ليل وفيك الطول مآسينا
ونسكب في دموع الشوق وما بنلقى البواسينا
وحبيبنا هناك بعيد وحيد وناسينا
متين يا شوق ظروفنا تروق،، على الأفراح ترسّينا"

أما عملاق الفن السوداني محمد وردي متعه الله بموفور الصحة والعافية
فقد ظل ينادي مراسي الشوق بأعلى صوته مردداً:
" يا مراسي الشوق تعالي تعالي تعالي
لا الليالي تمر بدونك هي الليالي
من ضواحي الدنيا جيت وعلى رحالي
لمدائن في عيونك يا محالي
ريحني أستري حالي
عيوني في الدمعات وحيلة
أسمحيلة تشوف عيونك أسمحيلة
أنا لا الصبر قادر علي...ولا عندي حيلة "

ولعل الفنان أبو عركي البخيت كان منشغلاً بأمور الدنيا
فأرسل مرسال الشوق ليطوف بكل الحبان في كل مكان
فأخذ المرسال يجتاز الصحاري والوهاد في طريقه إلى
جبل مرة في غربنا العزيز:

" مرسال الشوق00 ياالكلك ذوق
أغشي الحبان 00في كل مكان
قول ليهم شفنا00جبل مَره
وعشنا اللحظات00حب ومسرّه
بين غيمه تغازل00 كل زهره
وخيال رمانه00علي المجري
لوحة فنان00تمحي الأحزان
صُفره وخـُضره00ُزرِقه وحُمره
حلوه ونضِره00وزفة ألوان
بين غيمه تغازل00كل زهره
وخيال رمانه00علي المجري
مرسال الشوق
وزهر ناير00نادي وبسّام
بالحيل داير00ريشة رسام
جيرانو جداول00هيمانه
وصنوبره00نادية وريانه
كزمرده00في صورة بانه
ورتنا العزيزه00العاجبانا
الدرنا تكون00هسه معانا
وتشوف بعيونا00النعسانه
وتتم الصوره 000الفنانه
ونقول ياربنا 00ياقادر
يا واهب كل شيء00نادر
يااللفنان000أمرك صادر
تجمعنا كمان00مره00ومره
بين الحبان 00في جبل مره
بين غيمه تغازل00كل زهره
وخيال رمانه00علي المجري
مرسال الشوق"

أما شاعرنا الفذ إسحاق الحلنقي فقد دعاه منادي الشوق
فلبى دعوته طوعاً وراضياً مرضياً حين قال:

" على رمل الطريق من بيتنا جابنا الشوق في سكتكم
وصحى الذكريات فينا طواف الغيم بحلتكم
إلى أن يقول:
وقالوا الفرقة بتغير وخايفين بكرة تنسونا
دوري دوري يا أيام ويا أشواق ودينا
نحن الليلة للحبان من سفراً بعيد جينا"

وقد سبقه الشوق ذات مرة قبل العينين وأخذ ينظر إلى الشارع
ليجده تائهاً في دموع المغلوبين:

" مرت لحظات وكمان ساعات طالت وحياتك ومنتظرين
لو وشوش صوت الريح فى الباب يسبقنا الشوق قبل العينين
ونعاين الشارع .. نلقاه تائه فى دموع المغلوبين
العيد الجاب الناس لينا ما جابك
يعنى نسيتنا خلاص ؟
مع انك انت الخليتنا نغنى الحب ذكرى واخلاص
صبحت دمعتنا وسادتنا كدى حاول اعرف لينا خلاص
شال النوار ظلل بيتنا
من بهجة وعدك وما جيتنا
وفضلنا وحياتك منظرين
شوف وين روحتنا وديتنا .. وين "

أما الراحل المقيم سلطان الطرب مصطفى سيد أحمد
فقد بدا وكأنه ما كان ينوي المجئ ولكن قد دفره الشوق (أي دفعه دفعاً):
"
يا مصابيح الطريق ..
يا المراكبية البتجبد ..
من فك الموج الغريق ..
جينا ليك والشوق دفرنا ..
يا نشوق روحنا ودمرنا ..
يا المحطات الحنينة ..
القصرت مشوار سفرنا ..
يا ما شايلك فيني حايم .. لا اليالي المخملية
لا العمارات السوامق .. لا الأسامي الأجنبية
بتمحى من عيني ملامحك ..
وإنتِ جايهِ المغربيهِ .. داقسهِ دايشهِ المغربيهِ
وشك المكبوت مكندك .. سمصونايتك زمزميهِ
كون شبر طوريه منجل ..
سبحه فانوساً مدردح ..
قلتي بيهن لي زمانك ..
يا زمان الآهه حدك ..
يا زمان الحاجة عندك ..
لا تطي الوردة الصبيه .. "

وضرب آخر من ضروب الشوق يجبرك
ترحل إلى الوطن من غير زاد كما في رائعة وردي:
"عيونك ذي سحابة صيف، تجافي بلاد وتسقي بلاد
وذي فرحاً يشيل مني الشقى ويزداد
وذي فرح البعيد العاد
وذي عيداً غشاني وفات، وراح عمّ البلد أعياد
وذي وطناً وقت أشتاق له برحل ليهو من غير زاد
بدون عينيكي أصبح زول بدون ذكرى وبدون ميلاد"

أما بالنسبة لي أنا شخصياً، فإن أبلغ ما قيل في الشوق تتجسد
جلية في أغنية الراحل ملك الطنبور النعام آدم التي كان يردد
فيها:
" لا شوفةً تبلّ الشوق ،،،، ولا رداً يطمّن
أريتك تبقى طيب إنت ،،،، والبي كلو هيّن "

إليكم جميعاً مع خالص الود
هدية الثلاثاء من كلمات الشوق:

" انا لو اقول إشتقت ليك
ماأظن بكون قلت الجديد
لكن بقول إحتجت ليك
والحوجة افضح للبريد
والوحشه في ليل البعاد تتنازع الأشواق شديد"

أحبتي المسافرين عذراً إذ سيتوقف القطار هنا هنيهة
ثم يستأنف السفر إلى المحطات الشوقية البعيدة







رد مع اقتباس
قديم 21-11-2006, 11:41 AM رقم المشاركة : 3
افتراضي

التزم بالصمت كثيرا وهاتفاه .....
تكشر لنا بانيابه وخفنا انه سيختفى ...
دخل بخاصيه المتخفى .... قلنا نصبر ...وصبرنا حتى فاق صبرنا صبر ايوب .
فاذا باليوم تنهال علينا بالخيرات يمينا وشمالا وتقاطرت علينا حبات البرد لتطفى نار الفرقه واذا بقطار الشوق تاتى حاملا كل الود يتدفق علينا بالحنان واهازيج الفرح مع اطلاله العيد ( ادين كرييه ) ...
تسلم يا ساده ... تسلم حسون افندى ... تسلم ايها الرائع
لكن تبدل حال الفن اليوم وتبدل قطار الشوق بقطر اويل
قطر اويل المسافه طويل .... السكه فتح يلا يا دقدق
الخخح
لى عوده سريعه







التوقيع


المفركاوى

رد مع اقتباس
قديم 21-11-2006, 11:58 AM رقم المشاركة : 4
افتراضي

أبشر خيراً أيها الراكب فأنت تعد أول راكب على متن هذا القطار
وإن كنت لا أدري إلى أين وجهتك ولكن لا بأس سوف نمنحك
تذكرة شرف مجانية إلى محطة وادي حلفا القديمة
ونتمنى لك رحلة سعيدة على متن قطار الشوق الذي شارف على الرحيل
والإنطلاق أم تُرى أنك ما داير سفر لكين بس نفذ القدر ؟
فالقطر الشالك إنت حيوديك حتة حتة
شكراً لإختيارك ناقلتنا الشوقية أيها العزيز







رد مع اقتباس
قديم 21-11-2006, 12:34 PM رقم المشاركة : 5
افتراضي



دعني ياحسُّون أن ألحق بكم في هذا القطار العجيب ... والذي أنا من أقدم راكبيه ..

سألحق بكم بعد أن أتزود بقليل من الزَّاد يعيننا في طول السفر ...







التوقيع



"وقُلنا لِمَنْ يتهجى حروفَ السياسةِ فِيهم:
لا الطيرُ باضتْ نُضارا
لا جُثةُ الكلبِ ترشَحُ مِسْكا
فمِنْ أين يُعطي الهشيمُ العسَل،
وكيفَ يُواري الرِّداءُ المُمَزَّقَ
عورةَ مَنْ يعشِقُ الرَّقصَ
في السَّاحةِ العارية ......؟!!!!



– فضيلي جّمَّاع

رد مع اقتباس
قديم 21-11-2006, 12:53 PM رقم المشاركة : 6
افتراضي


عزيزي الأعز دكتور فوزي
نعم صدقت في ذلك فإنك من الركاب القدامى
لهذا القطار ولا بأس أن أردت مزيداً من الوقت
لكي تستعد للسفر فسوف ننتظرك في محطة عطبرة
نتزود بالوقود ريثما تأتي ونشتم نسايم عطبرة الحلوة
وبعدها نكمل المشوار
عشان نلقى سيد الناس
ونطفي البينا من النار
ونشوف عينيه نعسانة
ولونه الزاهي كل نضار

وسوف نقلك على متن قطار الشوق
ونسافر بك إلى أصقاع السودان
ولسان حال من نخلفهم ورائنا
على أرصفة المحطات تردد وتقول:
" من بف نفسك يالقطار ورزيم صدرك قلبى طار
وينو الحبيب إنت شلته جيبه يا القطار"










رد مع اقتباس
قديم 21-11-2006, 01:41 PM رقم المشاركة : 7
افتراضي


ليتهم يعيدون سكة القطار إلى كوشة لتكون أول محطةٍ نصل إليها لنزور أهلنا

الطيبين ... ونملأ رأتينا من نسمات البلاد ... يا نسمات الشمال ...

ونتشبّع من حنين وطِيبة أهلنا .. ونأكل من تمرات نخيلنا ونرتوي من مياه نيلنا
...



لهذا الوطنْ

معمدة’’ جبهتي بالحَزَنْ ،

ومنذورة’’ كلُّ لحظةِ شِعرٍ ..

وميلادِ أُّغنيةٍ .. أو شجنْ ،

O لهذا الوطنْ

معمده’’. كلُّ رعشةِ حبٍ .. ،

وكلَّ ابتساماتِ هذا الزمنْ ،

O ومنذورة’’ .. كلُّ أيامِ عمري ..

فما كان منها ...

وما لَمْ يكنْ ،

O لهذا الوطن.


( من قصيدة للشاعر سيد أحمد الحردلَّو )







التوقيع



"وقُلنا لِمَنْ يتهجى حروفَ السياسةِ فِيهم:
لا الطيرُ باضتْ نُضارا
لا جُثةُ الكلبِ ترشَحُ مِسْكا
فمِنْ أين يُعطي الهشيمُ العسَل،
وكيفَ يُواري الرِّداءُ المُمَزَّقَ
عورةَ مَنْ يعشِقُ الرَّقصَ
في السَّاحةِ العارية ......؟!!!!



– فضيلي جّمَّاع

آخر تعديل Fawzi Salih Wahbi يوم 21-11-2006 في 01:58 PM.
رد مع اقتباس
قديم 21-11-2006, 02:17 PM رقم المشاركة : 8
افتراضي

يا ريت يا دكتور ومن بوءك لباب السماء
كنا أقلو رزنا أهلنا في فركة ومفركة وكوشة وفراجين وأبوصارى وقنس
لنجد مسونكيل في عبري (والله قلبنقا شورتنقا يا سلام)
تماماً كما وردت في رائعة العملاق مكي علي إدريس

وإليك هذه القصيدة حصرياً لشخصك العزيز
وسوف يحمله قطار مجازي يجتاز الدروب إلى السويد

بلد رايح
للشاعر عمر الطيب الدوش

حأسأل عن بلد رايح
وافتش عن بلد سايح
واسأل عن امانينا
اللي ما بتدينا
صوت صايح
وأسأل وين مخابينا
إذا جانا الزمن...
لا فح
واسأل عن بلد مجروح
وعارف الجارحو ليه جارح
وابكى على بلد ممدوح
وعارف المادحو
ما مادح
واحلم بي حلم مسروق
لا هو الليلة
لا امبارح
أعلق في جناح سفري
خطابات لي زمن فجري
وادخل من درب سري
لكل مضاجع الأحزان
واضفِّر من شجر بلدي
بروقاً مارقة من صدري
حأسأل عن بلد غاطٍ
لحدِّ الليلهْ في الوجعة
أَنط فوق سرجي واتْحزَّم
أقوم من وقعة
لي وقعة
أخُتْ ايدي البتوجِعْني
على السأم البراجِعْني
واسأل..
يا وطن يا بيتنا
ليه شوقك مواجهني
ليه حبك مجهجهني
وليه تاريخ زمن خسران
موكّر لسَّه في شجني؟
حأكتب لي شجر مقطوع
مسادير
يمكن يتحرك
خطابات لي طفل مجدوع
يقوم
يجرى
يقع
يبرُك
رسالهة لكل قُمْريّة
إذا دم الشقا اتوزع
على كل البيوت
ما تْرِك
واسأل..
عن وطن رايِح
واديكم خبر جارح:
بأنو جميع جموع الناس
حيفضلوا لا كراع
لا راس
ونشترى في الدكاكين يوم
مسابح من دموع الناس
مساحيق من هموم الناس
زهج
يتْعَبّا في الأكياس
ونعلن في المزاد علنا
وترغي الجوقة والأجراس:
"!نبيع الطفلة والكراس"
واصرَخ
! ياوطن! يا بيتنا
ليه ما تبقى لينا الساس
قدر ما تجري فيك
أفكار...
يزيدوا الحبس والحراس
قدر ما تجري فيك الخيل
تدوس الهيبة
والإحساس
واسأل
يا وطن رايح
اذا كل القبور دخلت
بيوت الناس
بلا استئذان
بلا صلوات
بلا أكفان
جريمة اسائل الدفَان؟
حريمة طلب تمن قبري
من البايع في أي مكان؟
واقولك يا وطن
رايح
واقولك يا وطن
آمر
سلام النفس ما كافر
ولا كافر
ولا كافر







رد مع اقتباس
قديم 21-11-2006, 04:29 PM رقم المشاركة : 9
افتراضي

دعوني الحق بكم فى قطار الشوق وأستمتع بأشعاركم الجميلة العزيز حسون والغالي فوزي أيضاً أستمتع بحكاوي المفركاوي

فقط أريد التنبيه السن المسموح للالتحاق
بقطار الشوق أن يكون ما قبل الخمسين
.







التوقيع

تستطيع أن ترى الصورة بحجمها الطبيعي بعد الضغط عليها
رد مع اقتباس
قديم 21-11-2006, 04:43 PM رقم المشاركة : 10
افتراضي

قبل قليل أخبرني المحولجي أن راكباً عزيزاً يلهث وهو يركض
صوب المحطة للحاق بقطار الشوق فحجزت له درجة أولى نوم
ويبدو أنه ينوي السفر إلى شندي العظيمة والمتمة للحصول على
مناديل العذارى الغرامية من حسان بنات الجعل الغر النواضر
وقد نقشت على حواشيها القلوب التي أصابتها
سهام الصبابة والغرام
وأفيدك علماً يا عزيزي مموشي أن لا فئة عمرية محددة
للسفر على متن قطار الشوق حتي ولو سَطّح الركاب
ما مشكلة المشكلة نسافر سوى على إمتداد السكة حديد

وشكراً لمرورك يا ظريف يا رايق







رد مع اقتباس
قديم 22-11-2006, 10:52 AM رقم المشاركة : 11
افتراضي


أحبتى على متن قطار الشوق دعوني أواصل المسير محطات الشوق
محملاً بهذه الأبيات الشعرية لشاعرنا الهرم الشامخ محجوب شريف:

" مشتاق ليك كتير والله
للجيران 000 و للحلة
خلاص قطر النضال وّلى
و غالى علىّ أدلى
محطة محطة بتذكر
عيونك ونحن فى المنفى
و بتذكر مناديلك
خيوطه رقيقة ما صدفة
و بتذكر كلامك لى
متين جرح البلد يشفى
متين تنعم سما الخرطوم
حبيبتنا ومتين تصفى
كلامك كان بعزينا
بزيد ما بينا من ألفة "

سوف أعرج اليوم عبر منعطفات مختارة وموجزة لتناول الشوق في الأغنية النوبية ولعل أشهرها قاطبة تلك التي تغنى بها فنان السودان الأول الأستاذ محمد وردي:

" إكي أي جلا إكا مشكا ،،، أور أقريسكا إكا جلا ،،، جلركن أيقا كَكا
كن فديلي "
" إنني أهيم بك شوقاً وحنيناً،،،، وتعتمل ذكرياتك في حناياي ليلاً ونهاراً
ويكاد يفتك بي ويرديني قتيلاً"

إلى أن يستطرد في ذات الأغنية ويقول:
" إر نوقل ويكَا جاقموني ،،، إلم دلقدتا جَاقي
أُوسن تا جَمن كدوشو ،،، كدولي موجا جاقي
دنيل دَارن أرتا ،،، أيلنم إنا كاقي
إن فا منقا آيكون والله صعبان فراقي "
" يا من لا تهابين أحداً في البيت ،،، لم تهابين الحب
فها نحن قد غرقنا في الحب سوياً فما خوف الغريق من البلل
وهأنذا أحمل بداخلي سقام الدنيا بأجمعها
فماذا تراك فاعلة حيال هذا الفراق الصعب"
لا زلت في حضرة الأستاذ وردي حيث أذكر بالكاد أغنية نوبية قديمة له
حيث يقول:
" مُوشل أيقا إلا ،،، نلو أن قلا
دلقدا والله إن إيقي نلا ووا أني
إرم أيقا إسقوميني"
" لقد هدني الشوق فقلّ نومي
فما هذا الذي دهاني؟ هل هو حب أم جمرة من اللظى؟
ألا تسائلينني ماذا يكون؟ "



أما القامة الفنية السامية مكي علي إدريس فقد دلا بدلوه في سيرة العشق بأسلوبه الحنين المتميز فقد شدا في أغنية هيلة مردداً:
" أيقَم إيلجو مُوشنوي ووا هيلة
دجا تروس أوجنوي ووا هيلة
ويو إكا نينوي ،،، آنجنتان سنة كيلا"

" لقد هدني الشوق كياني وأعياني يا هيلة
آه لو تشابكت أيدينا ونحن نذرف دموع الشوق سويا
ليتني أكحل عيني برؤيتك في العام القادم بمشيئة الله "

أما مارد الإبداع القادم من أرض الحجر محمود أحمد خيري
فله تناول آخر لكوامن الشوق الذي ظل يعتلج بداخله:

" بالله إن ويدا تاركا ،،، إركن قتانقوسكا
إيقلو جركا تموني،،، إنان ويدا تاركا
قمي قميك ألقموناني ،،، إلي ولوكا ألقموناني
أوين دافيجي إنقر فرقموناني
تاري تاري
تاري مشكلون تاري ،،، دسين ألمل أوساني "

" أسألك بالله أن تعودي إلينا ثانية
وأن تتضمخي بأريج البلد الفواح
فالسنوات والأيام تمر وتمضي
ولا ندري ماذا يخبؤه لنا المستقبل في طياته
هيا، عُودي، عودي إلينا أيتها الحبيبة،، فقد هاجت بنا الأشواق،،
فما أفظع الخضرة حين يدركها اليبس ويطالها الجفاف"

ومطلع هذه الأغنية تعد تحفة أخرى حيث يقول:
" إكا نوقونل أي مارا ،،،، سم أونن شادوا أوي دَاموني أسوارا
فَكينتاني نقو مسو والله أيلون إدو سَمارا "


" لقد قض مضجعي القلق حينما وجدت أنك لم تخلفي آثاراً تُفضي إليك
أمام دياركم ،،، فهل غادرت البيت لتعودين إليه مجدداً يا جميلتي!!
أم أنك ما عدت تشتاقين إلينا وجفا قلبك!"


" ويرن إسكتي ديمان وتي ،،، قُر وسال ديقفين قنتي
شورتن أوتي ،،، أنتن بتي ماج جت أين فنتي
جَابكرم أَيقَا مولناك ،،، تبدن آق قَاشكرن جُلين بَرم قتي"

" أيتها الضيفة البعيدة والفريدة دائماً ،،،
أيتها المخضرّة بهاءاً ،،، تماماً كنبات اللوبيا التي زرعت في أرض واسعة
يا توأمة روحي،،، يا شبيهة البدر ويا قرة عيني وحبيبة قلبي
ضُميني إلى جوارك يا غادتي الحسناء،، يا ذات العطر الفواح
كعطر أوراق الشجر التي يداعبها الأمواج فتتراقص طرباً "

ويقيني أن أبلغ عبارات الشوق والوله قد وردت في رائعة المطرب
المبدع عباس عثمان فتخيلوا معي كيف أن امعشر العشاق كانوا قد إنفضوا
وبرحوا مكان السمر بعد أن طال بهم الليل وإرتحل القمر رويداً رويداً
عن كبد السماء فلموا البروش التي كانوا يجلسون
عليها وهموا بالإنصراف وبغتة لاحت لهم الغادة شامة
لتنضم إلى جلسة الريد:
فأعادوا فرش البروش مجدداً من شدة الشوق:

" ونس خلصصين باتل ،،، برشيق ويدكر آوشا
أنتن قيّا نقسين باتا ،،، أنتي إجيكا هدوا إلسا
شامق تارن أكردل ،،، عاشقي فإسكا حملشا "
بالله عليكم تأملوا معي هذا السحر وهذا الجمال"

سأتوقف قليلاً هنا لأستأنف السرد لاحقاً















رد مع اقتباس
قديم 22-11-2006, 12:50 PM رقم المشاركة : 12
افتراضي

أخي الحبيب حسن سادة
لك التحية والمودة والتقدير
قطار الشوق ذكرني بالفترة الجميلة التي أمضيناها في عطبرة
؟إبان الفترة الدراسية بالمرحلة الثانوية ، والسفر بالقطار من عطبرة إلي حلفا وبالعكس في العطلات عبر فيافي صحراء العتمور ومحطات بربر والعبيدية ومحطة ابو حمد والشاي بكبابي الشوب الكبيرة بالشريك الصاموتي
ذكرني بالونسة والضحك والتسطيح وفتونة الشباب
ليتها تعود تلك الايام .... ليتها تعود.
إنني رغم تأخيري سأبذل قصاري جهدي للحاق بقطار الشوق
واقول ليك
بين اللهفة لي شوفتك وبين البين
لهيب نارين
نار مشبوبة من شوفكم
ونار مالينا آه وأنين
سعيت أطفيها بايدي
لقيت بطفيها شوف العين







رد مع اقتباس
قديم 22-11-2006, 01:10 PM رقم المشاركة : 13
افتراضي

أحبتي ركاب قطار الشوق
نأسف لهذا التأخير المفاجئ في عاصمة الحديد والنار
فقد كنا قد توقفنا طويلاً هنا لكي يتزود الديزل بالوقود
وكنا على وشك الإنطلاق صوب حلفا إلا أنه قد بلغنا
من مراقب السكة حديد أن قطار كريمة في طريقه
إلى المحطة وهو يسير في نفس الخط رحلة سعيدة
نتمناها على المسافرين.

بيان آخر هام وعاجل من سواق قطار الشوق

أبشروا أيها الراحلين إلى حلفا بقيادي
فقد إنضم إليكم راكب Regular
وعزيز علينا كلنا ولا شك أنه سوف
يبدد وحشتكم وسوف يصطحبكم مؤنساً
وأليفاً إلى حلفا ولابد من حلفا وإن طال السفر

مرحباً بالعزيز الغالي/ عثمان جودة
على متن القطار وشكراً للقصيدة
الرقيقة التي تعكس المشاعر الفياضة
وواصل في مشاركاتك معنا هاهنا أيها البار







رد مع اقتباس
قديم 23-11-2006, 12:58 PM رقم المشاركة : 14
افتراضي

يا سلام منك انا اااااه يا سلام يا سلام
سلام تعظيم لربان القطار ود ساده وزملائى الركاب
وانا اتجول قطار الشوق من الفرمله لغرفه المحركات للبوفيه والسطوح لقيت اغنيه محمد وردى ملصقه باحدى الجدران تحت ترجمه ودساده ووقفت كثيرا لاقى شائبه فى الترجمه ... سبحان الله نفس المعنى وبرونقها الرطانى الجميل الرائع .... ولييه قالو لى عندما تترجم العربى الى رطانه بغير المعنى ؟؟؟؟؟؟
اتاكدت اليوم تماما ماذا يعنى كلمه ( ادو العيش لخبازينو حتى ولو حياكلو نصو ) .. رائع ود ساده وانت تفنفن فى الرطانه لتسهيل الفهم لغير الناطقين بها ..... وكنت شاركت ببعض اشعارى بالمنتدى ولم يجد قبولا لعدم فهمهم فيما اكتب وتوقفت من وقتها !!!!
تخريمه : سالملم اشعارى وارمم ما تبقى فى الخواطر ... ( حقوق الترجمه محفوظه )







التوقيع


المفركاوى

رد مع اقتباس
قديم 23-11-2006, 01:43 PM رقم المشاركة : 15
افتراضي

العزيز مفركاوي
يبدو أننا سنسافر وحيدين في هذا القطار المتجه بمشيئة الله
إلى حلفا القديمة حتي العزيز عثمان جودة قد تركنا ونزل في
بربر ولعل أحداً همس في أذنيه قائلاً له:
" يا مسافر إتدلى وسيب السفر يالله "
أما العزيز دكتور فوزي فقد نزل هو الأخر في محطة الشريك
ولسان حاله يقول:
" مسافر والفراق لحظاته صعبة
أنا تب في السفر مالي رغبة
مسافر للشروق جسماً بلا روح
حبيبة روحي هي حياتي والروح"

أما أنا وأنت فما زلنا على متن القطار
وإديني رضاك قدامنا سفر
سفراً مكتوب ما بيتأخر







رد مع اقتباس
قديم 25-11-2006, 12:47 PM رقم المشاركة : 16
افتراضي

نداءءءء
تعطل القطار بنمره 6 ونحن فى انتظار الامدار ....
التمويين خلاص شارف النهايه والقراريص ما يديك الدرب ...
لكن مش عارف من اى لحم هذه الطبائخ حيوانات بريه ام اليفه ؟؟؟؟ الغايتوا حناكل مما نصطاد لامن يجينا الزواده ..







التوقيع


المفركاوى

رد مع اقتباس
قديم 25-11-2006, 11:23 PM رقم المشاركة : 17
افتراضي




أخي حسوُّن ....

أنا في محطة أبو حمد لقيت سِت شاي تقول للقمرة أسكتي ساي ... وقعدت أضرب

في االشايات بالرغم من أنِّي ما بشرب شاي .. وخلصت َعشرة براريد شاي والفحم خلص ورحت ألملم ليها شُويَّة

حطب من جنب البحر والقطر فاتني .. غايتو أجَّرتَ لاندروفر ولحقت القطر في

نمرة 6 ... والله أنا شاكي أن ست الشاي دي عندها علاقة بال FBI أو المخابرات

المركزية الأمريكية .. وماممكن تكون سودانية ...


كابوس صابر أيوب
(ست الشاي) (أف. بي. آي)
هاشم صديق

الرادي يساسق
بين بريطانيا
وبين أمريكا
...
و(صابر) سارح
لنفسو يصارح
-يا صابر هوي
رمضان جاييكا
حتجيب من وين
قروش السكر
وحق الويكة؟!
..
(الرادي) يناهد
وسط الحوش
بين (بن لادن)
و(عمر المُلا)
و(مستر بوش)
-تصريح
من لندن
-أخبار
من (غزة)
وجيران صابر
عاملين (قعدة)
انقلبت (ندوة)
في الكأس العاشر
(بالعرقي) الداشر
والليل مصبوغ
بي ريحة (المزة)
...
الرادي يكورك
وسط الحوش
-افغانستان
موت أفغان
-مستر بوش
وخواجة بيصرخ
وصوته مرخرخ
زي (حنكوش)
-القصف يدُك
أركان (كابول)
...
ووالدة (صابر)
حاجة (بتول)
مشدوهة تقَطِّع
عيش الفتة
تكُبَ سرحانة
في موية الفول.
-يوماتي عشاهم

(فتة بوش)
والرادي يساسق
بين (بن لادن)
ومستر (بوش)
وصابر يطنطن
-الصاح مقلوع
السيف مرفوع
الكلمة غموض
والمغنى فروع
الدنيا خراب
والأقوى مهاب
والعدل رهاب
...
الليل مشروق
بي فتة فول
وصوت (الحاجة)
الوالدة (بتول)
يناغم صابر
-شنو الإرهاب؟
ويتمتم صابر

قلـ...قلتي
شنو؟
وترد (الحاجة)
-مالك مرعوب؟
تتلفت ليش؟!
تقول مزرور
بي عسكر وديش؟!
سألتك بس
شنو الإرهاب؟!
واتنحنح (صابر)
صنقع ودنقر
حك رويسو
اتمدد وصنقر
وقال للحاجة
-سؤالك يمة
جوابو كتاب
لكن....
لكن يا (حاجة)
زي ما تقولي
طلع ربّاط
في الليل
لي زول
بي سيف مسلول
وشال من جيبو
قروش العيش
وحق الفول
أو زول آمن
يقع في مكيدة
يموت مكتول
وزي تغيان
على الفقران
على المسكين
على الأعزل
على المشلول
...
وتتدقق
غبينة (الحاجة)
زي راجمة
وتصبح ناغمة
-وحسع نان
منو الرباط؟
امريكا؟
(بن لادن)؟
ولا الأفغان؟
من التغيان
منو المسكين؟
من المظلوم
(مستر بوش
ولا فلسطين؟
شنو الـ......
منو الـ....
...
ضحك (صابر)
وحك رويسو
واتنحنح
وقال للحاجة
-يمة اتعشي
أكلي البوش
لو عارف ردود
لي ديل
ما كان الرويس
مدووش
...
سكت صابر
رقد معبور
وصوت الرادي
لا في الدنيا
لسة بيدور
سرح صابر
ودمو يفور
نكش حزنو
وقال لي نفسو
من قلبو
أريت الدنيا
حسه تغور
...
سمع صوت أمو
تاني يلح
-دحين يا وليد
بدور أسأل؟
ويرد صابر وضيق العبرة
طعمو ملح
نعم يمة
قايلك نمتى
وترد الحاجة
أنوم كيفن
وصوت الرادي
في أضني
زي مكنة؟!
بدور أسأل
دحين أمريكا-
ما ياها
العذابا دنا؟؟!
...
ويرد صابر
وضحكو علا
-عذاب أمريكا
ولا هنا؟؟!
عذاب أمريكا
ولا أنا؟
ويصن لحظات
-دحين يمة
-ورمضان جاي
هم أمريكا
ولا اللقمة
والويكة الرادي يساسق
بين بريطانيا
وبين أمريكا
...
و(صابر) سارح
لنفسو يصارح
-يا صابر هوي
رمضان جاييكا
حتجيب من وين
قروش السكر
وحق الويكة؟!
..
(الرادي) يناهد
وسط الحوش
بين (بن لادن)
و(عمر المُلا)
و(مستر بوش)
-تصريح
من لندن أخبار
من (غزة)
وجيران صابر
عاملين (قعدة)
انقلبت (ندوة)
في الكأس العاشر...
ترد الحاجة تفتش لكيس
تمباكا
في الكراب
نقول همين
عذاب وعذاب
تخت السفة
وتتبرطم
-دحين يا وليد
ده مو الإرهاب؟!!
...
ويصن الليل
ورأس صابر
يدقدق ساي
يشرق جاي
يغرب جاي
- كراتشي
- أباتشي
- أنقرة
- عنقرة
- ربع الويكة
- صوت أمريكا
- جمرة خبيثة
- مكيدة دسيسة
- بي. بي . سي
- أي. أن. تي
- سي. أن. أن
- توني بلير
- كلام الطير
- خبر وحواشي
- إبراهومة
- أموكاشي...
ويقع صابر
في بير النوم
ويشوف روحو
بدل (أمجاد)
ركب بعشوم
وشاف الناس
توسوس ساي
خبر يا هناي
ست الشاي
أف. بي آي
وأحمد بيه
سي . أي. أيه
ووسط الموز
لقينا (كروز)
-برج كلتوم
ملان بحمام
وقع صاروخ
شق حشاهو
سكن جواهو
سوا حطام ويغوص صابر
غرق أكتر
في بير النوم ويشوف الحاجة
امو (بتول)
وسط الزحمة
رافعة أيدها
بي قندول
تكورك وتهتف
- لا أمريكا
- بل فتريته)
(أنحنا الساس)
رافعين رأس
ما ببنتراجع
ما بنتهان
ما بنخاف
الأمريكان
...
ويشوف صابر
بيوت الحلة
تتغامز
وتتريق
على الحاجة
وتتلامز
ووسط اللمة
صوت الحاجة
عالي فصيح
(تشيلو الريح)
...
صوت الرادي
مابي النوم
الموت أخبار
الظلم حصار
الرعب خيار
والليل حزنان
الليل عريان
والقمرة هدوم
الليل مفضوح
والنجم كتوم
الدينا تصن
لقيامة تقوم
صابر مجروح
في نومو
يئن
وفي الرادي تجن
بالتار
(بيق بن)
والنشرة تجيب
أخبار الشوم
كابوس صابر
قفة خضار
سوت جنحين
طارت لي فوق
والفاقة مطار
...
كابوس صابر
يعلم أيه والدنيا مصالح
وسي. آي. أيه
...
كابوس صابر
الناس بتوسوس
وتنضم ساس
ست الشاي
أف بي آي
...
كابوس صابر
الدنيا مغازي
يموت الحب
ترمي أخوك
في بطن الجب
وتترتر غادي
تناصر الغازي
...
كابوس صابر
الكلمة ضحية
إرهاب مشروع
وإرهاب وحشية
ضحايا غبش
وضحايا غنية
...
كابوس صابر
الناس (بالقرجة)
تقيف للفرجة
تغير لونها
ميتين درجة
...
كابوس صابر
هم الويكة
والفتريتة
ونار أحزانو
ونار أمريكا
...
كابوس صابر
الصاح مقلوع
السيف مرفوع
الكلمة غموض
والمعنى فروع
الدنيا خراب
والأقوى مهاب
والعدل رهاب
الرادي يلغلغ
وسط الحوش
بين (بن لادن)
و(عمر الملا)
ومستر بوش
- أفغانستان
- موت أفغان
- القايمة تطول
- عراق.. سوريا
- جنوب لبنان
- وما معروف
- تاني كمان!
تجي الحملة
عقاب جملة
(على الإرهاب)
...
على الإنسان؟!
القصف يدك
أركان كابول
ووالدة (صابر)
حاجة (بتول)
حلمانة تقطع
عيش الفتة
تكب سرحانة
في موية الفول
يوماتي عشاهم
فتة (بوش)
والرادي يساسق
بين (بن لادن)
ومستر (بوش)
...
صوت الرادي
مابي النوم
والليل حيران
الليل حزنان
الليل عريان
والقمرة هدوم
الليل مفضوح
والنجم كتوم
...
كابوس صابر
قفة خضار
سوت جنحين
طارت لي فوق
والدنيا مطار
...
كابوس صابر
صوت مبلوع
حق مقلوع
والموت بالجوع كابوس صابر
يعلم أيه
والدنيا مصالح
وسي. آي. أيه
...
كابوس صابر
الناس بتوسوس
وتنضم ساي
ست الشاي
أف. بي. آي







التوقيع



"وقُلنا لِمَنْ يتهجى حروفَ السياسةِ فِيهم:
لا الطيرُ باضتْ نُضارا
لا جُثةُ الكلبِ ترشَحُ مِسْكا
فمِنْ أين يُعطي الهشيمُ العسَل،
وكيفَ يُواري الرِّداءُ المُمَزَّقَ
عورةَ مَنْ يعشِقُ الرَّقصَ
في السَّاحةِ العارية ......؟!!!!



– فضيلي جّمَّاع

رد مع اقتباس
قديم 26-11-2006, 11:10 AM رقم المشاركة : 18
افتراضي

رائع ايها الرائع فوزى واسالك عن صاحب البوست اين اختفى ؟؟؟؟؟

من رائعه ابو عركى البخيت
الجميل السادة
وضاح المحيا
التفت يوم شفتو
ماقبلان تحية
من دلالو ولا مالو
خلا نيران قلبى حيه
ابتسامة الزول بتنبع من شعورو
كيف تزعل لو تعبر عن سرورو
والبقابلك بيتسم ليك من ضميرو
لو سمحت تجاملو بمجرد تحية
كان أملى تفرحنى منك ابتسامة
وابتسامتك حلوة بتزيدك وسامة
العيون تتلاقى ويتم انسجامها
وكل واحد بيحلم بلحظات هنيه







التوقيع


المفركاوى

رد مع اقتباس
قديم 26-11-2006, 06:41 PM رقم المشاركة : 19
افتراضي

اختفاء سوّاق القطار في ظروف غامضة

ونحن الله أعلم
يمكن ما نلحق قطر العفش كمان

جميلة هي هذه الرحلة بين ثنايا الحرف
تصوغها أيدي مبدعة في هذا المنتدى الرائع

لكم التحية جميعاً

وأشكركم على هذه المحطات الممتعة







التوقيع

يشرفني زيارتكم لمدونتي
رد مع اقتباس
قديم 27-11-2006, 10:59 AM رقم المشاركة : 20
افتراضي


أحبتي في هذا القطار الذي يزحف رويداً إلى الشمال
وقد غادرنا على التو محطة شريك متجهين إلى أبو حمد
وقد خلفنا وراءنا أطفالاً سمر قد تعلقوا بنا وأخذوا يرددون
بصوت كورالي واحد:
" لما القطار صَفّر شالو
دموعي من عيني سالوا
آه آه أنا ما نسيتوا"

العزيز مفركاوي لم يكن غياباً ولكن:
" القطار فرقنا
وآه حزنا ملكنا
فى الرمال الباسمه تحكى الرياض مجلسنا
فيها هل هلالنا وبين ربوعه نشأنا "

صديقنا الدكتور فوزي شكراً للقصيدة المعبرة
وخلينا نسافر ونشقى لو ينفع شقانا
ونقول فارقنا طوّل يا حليلو
ويللا وتعال يللا نسافر لي بلاد الله
ننسى الناس وينسونا وفوقنا الطيبة تتدلّى
وإليك هذه الهدية الأدونيسية الرائعة:

هربت مدينتنا
فركضت أستجلي مسالكها
ونظرت - لم ألمح سوى الأفق
ورأيت أن الهاربين غداً
و العائدين غداً
جسد أمزقه على ورقي.
ورأيت - كان الغيم حنجرة
و الماء جدراناً من اللهب
ورأيت خيطاً أصفراً دبقاً
خيطاً من التاريخ يعلق بي
تجتر أيامي وتعقدها
وتكرّها فيه - يد ورثت
جنس الدمى وسلالة الخرق.
ودخلت في طقس الخليقة في
رحم المياه وعذرة الشجر
فرأيت أشجاراً تراودني
ورأيت بين غصونها غرفاً
و أسرّة وكوى تعاندني،
ورأيت أطفالاً قرأت لهم
رملي ، قرأت لهم
سور الغمام وآية الحجر
ورأيت كيف يسافرون معي
ورأيت كيف تضيء خلفهم
برك الدموع وجثة المطر.
هربت مدينتنا
ماذا أنا، ماذا؟ أسنبلة
تبكي لقبرة
ماتت وراء الثلج و البرد
ماتت ولم تكشف رسائلها
عني ولم تكتب إلى أحد
و سألتها ورأيت جثتها
مطروحة في آخر الزمن
وصرخت - " يا صمت الجليد أنا
وطن لغربتها
و أنا الغريب وقبرها وطني. "
هربت مدينتنا
فرأيت كيف تحولت قدمي
نهراً يطوف دماً
ومراكباً تنأى وتتسع
ورأيت أن شواطئي غرقٌ
يغوي و موجي الريح و البجعُ.
هربت مدينتنا
و الرفض لؤلؤة مكسرة
ترسو بقاياها على سفني
و الرفض حطاب يعيش على
وجهي - يلملمني ويشعلني
و الرفض أبعاد تشتتني
فأرى دمي وأرى وراء دمي
موتي يحاورني ويتبعني.
هربت مدينتنا
فرأيت كيف يضيئني كفني
ورأيت - ليت الموت يمهلني.

أما الإبن العزيز هشام
فلا تسعفني الكلمات لأصف مقدار سعادتي
لولوجك هذا البوست فإكتفيت بأن فرشت لك
بريمو الدرجة الأولى مجاناً وهذه الأبيات:
خطب النسيم وقال إنك في الطريق ...
رئتاي صفقتا وصفقتا ..
وصفقتا كأجنحة الحمام ..
والشعر أفلت من عقالة توبتي
واندس في وبر الهيام ..
فالليلة البدر التمام ..
والليلة الأفراح يـــا ..
نورت لي ..
ومنحتني صفة التلطف عند مدخل المقام ..
صعب علي وأنت قد بشرتني ..
أن لا أبوح ..
بشرتني ابْيَضَّ المدى حولي .. بروقك أوشكت وتهيأت مقل السفوح ..
بشرتني فالنور والأظلال واللحــن الصداوي المؤوج ...
قصر الزمام على البصيرة والتقت ..
صرط العروج ...
فاغفر إذا شوقا ..
دخلت إليك من باب الخروج ...







رد مع اقتباس
قديم 27-11-2006, 03:35 PM رقم المشاركة : 21
افتراضي

مشتاقة لي كل التفاصيل المعاي
و الذكريات الماتعة
كل الاماسي الكنت فيها
بيك صارت فارعة
طولنا قامة الحب سوي
ما جاي اقول اه يا هوي
شكرا لكل القلنا عن باكر سوي
شكرا لكل خاطر سقي الحاضر روي
شكرا لخط الاستواء
الحرر كلامك ساعة يكون زي النسيم
لطف مسامك واندلق صدقك عميم
شكرا مناجاتك وكت همسك حميم
شوفي كيف بيناتنا ازهرت الجروح
وشوفيني كيفن يوم نهلتك ابتهلتي
صبيني من حُقِك نفوح
عابق عطر غيمة ودعاش
ختيني فيك جواي نبوح
قاصدين زمن وردة وفراش
كان نلحق العمر البروح
قبال ملاقاة الرشاش
ياخيمة في الزمن النزوح
ياواضحة في الزمن الطشاش

منقووووووووووووول

ومع التحية لحسون الشفيف

وبجي صادي






التوقيع

_________________________
نحن شأنا ان نكون العمق في بحر التماسك ،،،،،

رد مع اقتباس
قديم 27-11-2006, 04:13 PM رقم المشاركة : 22
افتراضي

مرحباً بالحبيب العائد/ الإبن عصام السيد
حكايتك شنو يا عصام قبل سنة نرسلك
في مهمة رسمية في بوست آخر
وألقاك فص ملح وتدوب وألقاك الليلة
مسطح في قطار الشوق وشكلك كدة ماشي لغاية
النمر بس عموماً نورت وشرفت القطر الشالك إنت
وهاك الهدية الحصرية دي علشانك:

قلت ليها وإيدى فى إيديها ..
ودمعة حزن سالتْ
جايى منـِّك .. وماشـِّى ليك
يا مداين غربة طالت
ولو مدارات نجمى ضلـّتْ
سكة السفر إستحالت
كونى فى دربى الحقيقة
اللَّيها ديمة مشاعرى مالتْ
**********
قلت ليها ... وكنت راجع لى عينيها
من أسى الزمن البسافر .. فى المشاوير العصيبة
من متاهات الأماسى
الفى مداها .. الحزن مضناها .. وحبيبا
بينى لا بينك .. مزار
لا محطات إنتظار
ولا مواعيدك قريبة
إنتى يا الفرح الحقيقة .. المستحيل
هدْهِدى الصبر الجميل
وأمسحى الحزن المخيِّم .. فى مدارات الرحيل







رد مع اقتباس
قديم 27-11-2006, 05:15 PM رقم المشاركة : 23
افتراضي




1-

مسافره خلاسْ !

ونحنَ الدوبنا

يا دوبْ جينا

شايلينْ فى العُيونْ أمطارْ

وجايينْ

من ليالى الشوقْ

ودايرِنكْ تكونى نهارْ

وجيناكْ

قُلنا نبقى سَوا

ونكون للحبْ أهلْ وديارْ

وجيناكْ

شانْ تكونْ ريدتنا

للعُشَاقْ وطنْ ومزارْ

عشَانْ الدنيا

تبقى حديقه

من أطفالْ .. ومنْ أطيارْ

تقومى تسافرى !

شِنْ يَبْقَالنَا

مِنْ بَعْدِكْ

وشِنْ يَبْقَالنَا من أشعارْ !

-2-

مسافره خلاسْ !

ولكينْ كيفْ

مُنو البِكرِمْ

مَعَايا الضيفْ

مُنو البِرْكِزْ

معاىْ فى الحاره

فوق القيفْ

مُنو البتحدى فى تَالاَيا

بردَ الليلْ

وحرَ الصيفْ

مُنو السَّوانى

أبقى جميلْ

بَعَدْ ما كتَ زىَّ الطيفْ

بحبِكْ

أيوه يا حليوه

لأنكْ لىْ دُعاشْ وخريفْ

لأنكْ

لىْ وَطنْ جايى

من التاريخْ ... بحدَّ السيفْ

( سيد أحمد الحردلو )







التوقيع



"وقُلنا لِمَنْ يتهجى حروفَ السياسةِ فِيهم:
لا الطيرُ باضتْ نُضارا
لا جُثةُ الكلبِ ترشَحُ مِسْكا
فمِنْ أين يُعطي الهشيمُ العسَل،
وكيفَ يُواري الرِّداءُ المُمَزَّقَ
عورةَ مَنْ يعشِقُ الرَّقصَ
في السَّاحةِ العارية ......؟!!!!



– فضيلي جّمَّاع

رد مع اقتباس
قديم 27-11-2006, 07:03 PM رقم المشاركة : 24
افتراضي

صديقي الدكتور فوزي
ها هو القطار يحملنا ويحمل همومنا على متنه
ويجوب بنا المدن الشمالية المهمشة
ونحن لا نكل من السفر
لِمُدُن بعيدَهْ تنوم وتصْحى
على مخدّات الطَرَب
والساقَيهْ طاحونة الأنين
طول الليالى بِتنْتَحِب
تحت الظلام
تحت المطر
عزِ الشتا
الساقيَهْ ثانيَهْ تقيف تكون
آمال عريضَهْ مُشَتّتَهْ
وأكباد صغيرَهْ مفتّتَهْ
تحت الظلام عِز الشِتَا

وما عليك سوى أن:

" أديني إحساس بالأمل
في كل رحلة شوق تطول
وادى الخطاوى الراجعة ليك
في سكتك وأمل وصول
ما الدنيا كلها انتظار
و الارتحال قدر الفصول
الموجة تحلم بالضفاف
والغيمة تحلم بالهطول
راحل معاي ضي الأماني
وذكرى في الأيام هناك
لحظات بتذخر بالمعانى
وكيف أنسى تذكارات هواك
نتحمل الغربة ونعاني
و نصبر عشان نكسب رضاك
ونغنى لو زاد الحنين
ويارتيو كان سفرا معاك "







رد مع اقتباس
قديم 13-12-2006, 07:26 PM رقم المشاركة : 25
افتراضي





أعيد وأردِّد كلام الأستاذ سيد أحمد الحردلّو .. عشان نبدأ من جديد سفرتنا
بعد تعطُّل القطار في نمرة 6 مع الخلل الفني الذي طرأ في منتدى عمارة ...

بحبِكْ

أيوه يا حليوه

لأنكْ لىْ دُعاشْ وخريفْ

لأنكْ

لىْ وَطنْ جايى

من التاريخْ ... بحدَّ السيفْ







التوقيع



"وقُلنا لِمَنْ يتهجى حروفَ السياسةِ فِيهم:
لا الطيرُ باضتْ نُضارا
لا جُثةُ الكلبِ ترشَحُ مِسْكا
فمِنْ أين يُعطي الهشيمُ العسَل،
وكيفَ يُواري الرِّداءُ المُمَزَّقَ
عورةَ مَنْ يعشِقُ الرَّقصَ
في السَّاحةِ العارية ......؟!!!!



– فضيلي جّمَّاع

رد مع اقتباس
قديم 14-12-2006, 03:03 PM رقم المشاركة : 26
افتراضي

عزيزي وصديقي الغالي الدكتور فوزي
شنو يا أخوي ليك مدة ما بنتَ
وبالرغم من ذلك أقول ليك:
" يا غايب عن العين إنت موجود في عيني الإثنين"

أما قطار الشوق فلا زال في إنتظار المزيد من الركاب والمسافرين

وشكراً لقصيدة شاعري المفضل الحردلو
وإليك هذه الدرة لنفس العملاق:

لم يَعدْ يعجبنا
شيء هنالكْ
كل مافي بيتنا
صار كذلكْ
لم نعد نفهم شيئا
ضاقت الأرض علينا
والمسالكْ
كلما قلنا نجونا
ألقتِ الدنيا
مزيداً من مهالكْ
لست أدري
أين نمضي
لست أدري... فيمَ ذلكْ
يابلاداً
كل مافيها... هَلوكٌ...
وابن هالكْ
يابلاداً
كانتِ الدنيا لها بعضَ الممالكْ...
حين كانت أهْلَ ذلكْ
لم تعودي
غير أرضٍ بين قوسين..
ونهرٍ غير سالكْ
لم تعودي
غير تذكارٍ من التاريخ..
مرميٍّ.. ومنسيٍّ.. كذلكْ
رغم ذلك...
ماتزالين بلادي... يابلادي
رغم ذلكْ

وشكراً لمرورك الشيق أيها البار







رد مع اقتباس
قديم 23-12-2006, 11:15 AM رقم المشاركة : 27
افتراضي

لا ادرى اذا كان القطار مازال يعانى بالعطل بنمره 6 ام هناك شى ما فى النمر الامامه استدعى سائق القطار لاحذ الحيطه والحذر الى الامام والاعتكاف هناك ..وربما تمرد من افراد طاقم القطار ولديهم شروط لتقسيم المهام والقطار والسلطه قبل وصول القطار الى المحطه الاخيره الذى حرم من نصيب التقسيمات ( سلطه - ثروه - بنيه تحيه ) ..
الرجاء من ربان القطار افادتنا بالذى يدور خلف الكواليس
نحن قلقين على القطار والركاب
متين ترحل تودينا
وكل عام وانتم بالف خير







التوقيع


المفركاوى

رد مع اقتباس
قديم 23-12-2006, 01:06 PM رقم المشاركة : 28
افتراضي

والله يا محمد سيد !!!
قطر حسون دا الظاهر عليه حخلينا ( نعيد ) في الخلا !!!
يخوانا همتكم معنا

نشيل الريد ونشيل حنان وده !!!







التوقيع

_________________________
نحن شأنا ان نكون العمق في بحر التماسك ،،،،،

رد مع اقتباس
قديم 24-12-2006, 05:28 PM رقم المشاركة : 29
افتراضي

الأخوة الأعزاء المفركاوي وعصام السيد
لكم تحية خاصة من إدارة السكة الحديد
مع بالغ الأسف للتأخير الطارئ

وشنو مالكم يا جماعة مستعجلين كدة ؟ يعني حلفا حتطير؟ ما في داعي للشفقة
وروّقوا المنقة كدة وأكلوا في القراريص بتاعة محطة الشريك دي ساكت

ويا عصام مالو لو عيّدت هنا مع أهلك الرباطاب والخرفان عندهم بالكوم
وكل سنة وإنتو طيبين وسالمين
آمين يا رب







رد مع اقتباس
قديم 24-12-2006, 05:41 PM رقم المشاركة : 30
افتراضي

يا حسسسسوووووون
نمره 6 ما فيها خرفان
فى قراريص بلحم الطير ( مش عارف اسم الطير )
ممكن صقر ممكن كوق ممكن ابوالقدح ( حلوه ابوالقدح ) من فصيله الطيور
مش قالوا زمان ( ترون وايكنقون كوقا )
اهنئكم بالعيد عبر هذا البوست الرائع مرسال الشوق
واتمنى لكم قضاء اجازه ممتعه مع من تحبون
ولكم منى قبلاتى الحاره ( ممممممممم )







التوقيع


المفركاوى

رد مع اقتباس
إضافة رد


الذين يشاهدون محتوى الموضوع الآن : 1 ( الأعضاء 0 والزوار 1)
 
أدوات الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة

الانتقال السريع

المواضيع المتشابهه
الموضوع كاتب الموضوع المنتدى مشاركات آخر مشاركة
دموع الشوق اسير الشوق المنتدى الثقافي 4 02-02-2007 01:40 AM
المشهد النوبي - حلفا الجديدة الاستاذ عمر طه - شاهد عيان راكب قطار التهجير Zomrawi Alweli جمعية التراث والثقافة النوبية 2 25-07-2006 02:34 PM
لكل شخص اهديه ورد الصباح باحلى عطرات الشوق chiquita الأرشيف العام 8 26-06-2005 03:30 PM
في حضرة السيّاب هشام آدم الأرشيف العام 1 24-04-2005 01:42 PM
تفعيل حساب اسير الشوق أبوالشوش الأرشيف العام 4 14-04-2005 12:39 PM


الساعة الآن 07:32 AM.


Powered by vBulletin® Version 3.8.7
Copyright ©2000 - 2014, Jelsoft Enterprises Ltd.
تنبيـه هـام : جميع الآراء والتعليقات المطروحة بأسماء حقيقية أو مستعارة تمثل وجهة نظر كاتبها وليس بالضرورة وجهة نظر الموقع