[fot1]
كرويات الصبر البيضاء انهزمت
ووجمت
وخر جوادك … قبل يقرب
حميات القلب السوداء
إنلمت
وضمت
وبرت أجسادك .. وبت تهضرب
من هضريبك ومر تعذيبك ..
بين النخلة ومجري النسمة
انساقط طاير …
حتحت
ريشو قصادك …
وكان ده حبيبك … وقمت تجقلب
بين القيفة وباب النهر ..
دبيب الريح من دبش القهر ..
اتلوي اتلبد ولدغ الشيمة
الشيمة انكفت ..
البحر انخج ..
الزبد انعج ..
الطين انحترب ..
ومرقت عقرب
ورفعت شارة ..
اندفعت فارة
تجاه المركب
ووقعت سارة
علي صنقور رواسي قريبك
وقام منوهدب
وكابسو جندب ..
وكان دي أمجادك
بين الميضنة والارصاد
انجرحت غيمة ..
الغيمة الطيبة وحاملة حلال
من ألق البسمة الفي الأطفال
من عرق النسمة الفي العمال
والناس الفال
انسرحت فيها ...
شظايا آذان الوقت الواقع
بين تقريبك .. وسرقة زادك
مدت ايدك تالا القبلة …
رشاشها يصيبك ..
تسبي نديهتك ..
تفقد جيهتك
تنزف تنسف
تجيني
قوافل أورادك
تقضف ..
تركض تالا جنازك ونعش أولادك
باري نحيبك ..
ترجف تتعب ..
تغضب تهتف ..
تلقي قصادك سد ومرابي
أرزقي ..
رباطة
وكور همباتة ..
لحي ونخاسة ..
وكل الساسة...
الباعو نصيبك باستشهادك
عاد ان شاء الله
تكون الجنة الماهلة ميعادك
إلا الحاصل ديل حسادك
بعض يقول الله لا عادك
وبعض إن لاقي طريقة يعيدك
تاني عشان الموت يصطادك
يا مجلوب في سوق الآخرة ..
ويا متمقلب تحت جهادك
خرّ جوادك ..
مات الطاير ..
لدغت شيمة
كرش الغيمة انبعجت
دمّت ..
عينيك طمت ..
وغمّ قليبك .. وكان دي بلادك
وين مستغرب ..؟
تقدر تكسر حمرة عينك ..؟
تنكر سيفك ؟؟
تابي جفيرك ..؟
دابك تقوى
يا بني آدم .. تفقد مرة .. مريرة ..
ضميرك تكسب ثروة ..
وتلقي العالم تحت سريرك
تشبع
تروى ..
وترضع ذاتك ..
من لذاتك ..
وحلو الحلوى
من ما تبلع يوت تتبرع ..
وكلك نخوة ..
صدقة لعمرك
وباقي حياتك … نصر الدعوة
حبة جوامع ..
وقبة صوامع ..
وكوتة
وكوتة
تفوت الفوتة
بأسرع صهوة
عمرة وحجة … وتسأل ربك
يقبل توبتك يغفر ذنبك
يمسح سفك ..
خيرات شعبك ..
أصلها كانت عترة في دربك
لما تعبت … وفاتك حزبك
لما ضهبت … وخانك قلبك
كانت هفوة في لحظة سهوة
عن الإنسان والحال الأسوأ
ودابك فقت ..
وجاتك صحوة
جيت وتكفِّر ..
يا رب تغفر ..
أغفر ..
أغفر
عبدك خاسر شيء ما بيسوى
إنت القادر .. إنت الأقوى
يا البتخادع حتي الله .. !!!
وين الشهرة .. المال … والجاه؟
وين السطوة ..؟؟
الجشع ..؟؟
القسوة ..؟؟
أركز ..
أركز
لا تجيب رخوة
يا متلبك في الأدران ..
الحجر الأسود ما هو البروة
وما ها مكاوى الكعبة تجيها ..
حين ينكرفس توب التقوى
وما في خرط للجنة تودي ..
لا في خطط ممهورة برشوة
والمشروع الديني الخالص …
ما محتاج لدراسة جدوى
ويات قال يا رب من قلبو ..
رد الخالق دائماً أيوة
اركز ..
اركز ..
لا تجيب رخوة
اركض ..
اركض ..
تالا أشجار العملة
واقصف ..
اقصف من أوراقها ..
يمكن تستر عورة شينك …
وما سواهو زمانك جملة
اركز ..
اقوى ..
ولف بشكيرك
فوق الراس … النشَّف غيرك !!
لا تستهوى ..
قضي منافعك وتم العمرة
وفوِّر موية زمزم قهوة
اركز .. اركز .. لا تجيب رخوة
ماك غلطان .. !!!
غلطان الشعب
الجزّ جراد الغفلة كفاحو
الجني ارباحو .. ضياع أرواحو
وجيد للحاصل …
وبخت الحاصد
ماك غلطان !!!
غلطانين الشهداء الراحو ..
الواحد ..
واحد
ماك غلطان !!!
غلطان الحزب الجمّ سلاحو
وخيلو تناهد
ماك غلطان !!!
غلطان زمنك
وأصلاً وطنك
ياها جراحو ...عندك شاهد
رفضك .. سجنك ..
شان الكادح
والمتكادح
يلقي صراحو …. ويبرأ الساعد
تهتف لامن تقضف دم ..
وشارعك هازيء ..
يهز أصفاحو .. وبرضو تجاهد ؟؟؟
لامن صقر سن منقارك ….
لامن طايرك قصو جناحو ….
وخرّ يكابد
ما حسابك … إلا عذابك ..
وليلاً دائماً كاتمو صباحو ..
ونجمك ساهد
لما بديت تفرز لي عيشتك ..
لاكو عويشتك ..
واجمعوا جملة بأنك تالف
وانو سقطت .. مع انك واقف
فوق أسمنت وتحتك عملة
هم الساقطين في البرد الناشف ..
وجاهم زاحف قوز الرملة
الإملاق العيش الشاظف ..
وفي ظلمات الزمن العاصف …
قاسي عبور أليم … يا نملة !!
وهسة غلابا الدنيا الكنت...
بتتعب غنية عشان برتاحو ..
المنك راحو ..
الكجنو حنك … وعنك أشاحو
ضراغم غادي
عليك يتجاوز .. بدون ما تنادي ..
وصاروا نفيرك وقت حصادك ..
ورابي نصيبك هرِّب ..
هرِّب ..خير بلادك برة وسيبك
يا أوعية البلد القطت ..
ما بيسقيك الدم الفاسد
ويا أودية الولد الشطت ..
ما بيشفيك اليم الراكد
إلا الدم البدأ يلقط ..
واحد ..
واحد
إلا اليم أب غيماً نقط ..
وجاييك قاصد
يا محبوبة في وضع خريف ..
شالع دجلو ..
وكضباً راعد
بيت راكوبة ..
وحوشو صريف ..
سوَّس مرقو ..
وسقفو يناهد
أحسن تحت المطرة نقيف ..
بي كفيك ..
كفي ..
والساعد
وراسنا …
نضاري الطفل الواعد
لامن يبقي سمانا نضيف ..
من تخويف ..
تسويف .. من زيف
ونلقي الوطن الحن ..
مو الطارد
واللا الموت
الدغري الواحد
[/fot1] 
الإهداءات
18-09-2005, 12:43 AM 
كرويات الصبر البيضاء انهزمت 
