من اشعار الفنان الراحل مصطفى سيد احمد

على بابك نهايات الصبر واقفات
بداية الدنيا هن واقفات
وكم ولهان وكم تطاير
بعد نتف جناحو وراك
لملم حر ندامتو وفات
قطع شامة هواك من قلبو
إلا هواك نبت تاني
وعلى بابك وقف تاني
الغمايم شايقة قطن الليل
مسافر فيها وحداني وبدون جنحين
يغنيك الهنا المافي
ويغنيلك رهافة حسو
ويغني على الجليد أمالو
ويحلم بالشتا الدافي
وقدر ما يمشي في سور الزمن خطوات

ما تتضارى ورا الدعوات

ما تتلبسى الفرح الفات، يسكن فيك النغم الزايف

ويسرق حاسة شوفنا

الواقفه على رجلين جواك

ونحن

الهاويه والمتْطامن من الأرض

آه من نحلك ساعة يرحل، لمن يكتب فينا الحنضل

ويختم عمره بفعل الشهد

قال الجدول

طلوع النخله ، مرور الريح

واحد

لكن الريح بتعانق حقل

ونحن بنطلع نخله وننزل

ونكتب في ذاكرة الصفق الأخضر

سجنا الريح في الورق الأبيض

ووجهناها ضد التمر الناعس ، يسقط زى قبعة الحارس

وزى الكان بيناتنا وفات

قالت غيمه

بين قوسين غيمه لئيمه

أولاد الشارع فهرس

لي كل المدن التهرس جوفك بالأسمنت

قالت ريح شوف الناس قنديل

لو ما نّور يحرق كوخ

وباقى الحله تنّور

أو يطلع بوخ

يقول للنسمه الزايفه اقيفى

لو تتفرد ريح تتشرد ريح

ريح الخوف.

لوتتفرد ريح تبدأ تفرتق ضفاير المدن الكاذبه

تعيد تسريحتك

يوم سمايتك شكل قامتك ، كيف تموتى وتحيي تانى

ويوم قيامتك

هوالبيدنا الثبات

يا مجلوبه

فى قافلة رق

ما بيستحمل صدرك رصاصة ظلم

يا صابت رحم الفال

يا قطعت حبل الحلم

ويا كنا نبيعك يا نسرق ، وإخترنا النار الضُلها يحرق

طمناك إنو الدنيا يخشها ضو

يجرح جلد العتمه ، دم الليل قربان فجرك

يا بت يا نيل

لو نامت قمحه على الأبيض وإتشرت زيو

وزاد الأبيض فى غيو ، مدد رجلو اليسرى

ماكان الكِسره جاتك من بره صفراء ومنكسره

زوجنّاك الشهداء

الماتوا عشان الشعب

زوجنّاك ما عندك ضره

زوجناك ما جاتك ضره ما إتشاف ماعونك

فى الحله يساسق ويلقى فتات

قال الأبيض للأزرق

يبقى ضد الإنتباه ، وضد تواريخ التمازج بينى بينك

البشوفك في مراهقة الخرائط

وفينا من وجع المسافرين واطه ما لاقت هويه

رد الأزرق

مطر الحبش

لو كان نبش جواك سقف ، وهدّ حيلك

في الدواخل ، وشد عصبك في المداخل

صوت مراكبى ويد بتسال في القمح

وفينا من فرح المسافرين

قصة الشمس القضيه

يا أعشاب النيل الأزرق

ما تتضارى وراء الدعوات

أقرأ تاريخك أخاف

أسال جبين الفجر القى الفجر

مطعون في القفا

هل سافرت في دمك المحقون رجاء حبة غضب

ما شلنا جمرك وإنطفأ

جوانا نارك والمطر

جايين ، بالكتابة وضربة الناس المهابه

لو هز نخلك باشبوزق

ما فارق التمر السبيطه، وما ساور الطوريه شك

إنو الأرض أنثى وبتحمل بالحلال

مين اللي قال

إنو المسافه البينا بين الشمس طاقه

أو مياه النيل بتدخل

في عروق السنبله المسقيه بى عرق الجعانين

والمساهرين بالبطاقة

أقرأ تاريخى وأقيف

أقرأ تاريخك وأقبف

جواكى والزمن النضيف ، جواكى من جواى غضب

سلّم مفاتيح السؤال

جيل الشمس

موكب حريق واقف علي باب الدخول

وبيناتو بينات الوصول

لحظة شهيق

ابدكى من وين فينى منك لسه حاجات من مخاوف ومن شجن بداك من وين وظنى انك فكرة اعلان الحياة وانتهاءت العوراض والمحن نفسى القاكى واكون انا كلى من بعضك او بعضى من كلك بدن داير القاك و اوحد دايرة الدم المقسمه بينى بينك شجن
بداك من وين ابداكى منى
ولا منك ابتديك محل000 محل
من ياتوا منفذ بدخلك كل الدروب الفيكى سداها المحل من ياتوا شارع بوصلك كل الدروب الفيكى معطونه لاخر وحل بستبيح كل المنافذ وادخلك
من بين كلامك بدخلك
من ابتسامتك بدخلك
من بين مسامك بدخلك
من اى قاسم مشترك او شبه التشابه بدخلك نتلاقى نهرين من تسامى واشتهاء ابداكى من وين
ابداك من حيث انتهت عندك الخواطر والانتهاء ابداك من وين

وبقيت أغني عليك
غناوي الحسرة والأسف الطويل
وعشان أجيب ليك الفرح
رضيان مشيت للمستحيل
ومعاك في أخر المدى
فتني يا هجعة مواعيدي القبيل
بعتيني لي حضن الأسى
وفتيني للحزن النبيل
ندمان أنا أبدا وحاتك
عمري ما شلت الندم
ولاعمري ليك كان الفرح
رغم احتمالي أساكي يا جرح الألم

كان نفسى قولك من زمان
بالكاتمو فى سرى ومكتم
فى حشاى مدسوس سنين
كان نفسى قولك من زمان
بالشايلو فى عينى معزة وفى القلب
ريدا يخاف الغربة والشوق والحنين
زاملنى زى خاطر الفرح
وكتين يقاسم الهم عذاب
وقتين مدامعى تكون جزا
وتفتح مباهج اليل ظنون
*****************************
كان نفسى قولك من زمان
سطوة محاسنك عندى ما كسرة جفون
وكت العيون تعبرنى زى خاطر المسا
سطوة محاسنك ما الرخام الفى الحرير
وكت الثغير يفجعنى بى حرفاً قسا
سطوة محاسنك عندى وكتين كبريائك ينهزم
لى طيبتى بى لفظة حنان
وكتين مشاعرك تنسجم فى عمرى
تنفح قلبى بى رعشة امان
سطوة محاسنك عندى وكتين شوقى يصبح فى هواك
.. ليل عزة ما بتعرف هوان
***************************
كان نفسى قولك من زمان
عينيك وحاتك غربتى وأهلى
وبلادى الفيها ضائع لى زمن..
عينيك وحاتك شوقى لى زولا ولوف..
من بعدو ساب عينى سهن
وأنا كنت دايرك من زمان
أشرح حكايتى معاك الِـف
أحكيك وأزيد القول ولف
وأتمنى لو قلبك عرف كان من زمان
من قبل مافى قلبى يتحكر
زمان الفرقة فى جرح لأسى
من قبل ما حرف الحقيقة الحلوة يتبدل عسى
ويصبح امانى كتيرة فى خاطر الحنان
كان نفسى اقولك من زمان
................................................

ولسه بيناتنا امسافه والعيون واللهفه والخوف والسكون
ورنه الحزن البخافه
تعدي بالفرحه وتفوت وابكي بالحسره واموت
في عيونك يامداين
يامداين اللهفه والخوف والجساره
عندي ليك مليون بشاره الف خوف والكلمه شاره
وانت لما الحب يهون في عيوني وفي عيونك
وايقى حايم بلاماره
يعتريني الخوف عليك
خطوه منك وخطوه ليك
راجي منك بس اشاره
وكلمه تديني البشاره
ولا بيناتنا المسافه

اظنك عرفتي عواصفك مهبي
اباري في خيالك يسوقني ويودي
ونهرك يعدي ويجهل مصبي
هواجسي البتزرع وظني البربي
بديتك خواطر بتصحي وتساور
وطيفك يزاور وروحك تحاور
تجيبني في زمانك موشح اساور
اقول بس نسيتك وجرحك يتاور
اظنك عرفتي عذاب المغني
وطبله المجدع شظايا التمني
حروفه البتجزع في لحظة تجني
خطاه البتهرع متين تطمئني
مسرح خيالك حصاني القبيل
معربد غباره وخلى الصهيل
مسافر مسافر وفاقد دليل
اظنك عرفتي هموم الرحيل

فتاح يا عليم
رزاق يا كريم
صلى على عجل
همهم همهمة
حصن للعباد
وهوزز سبحتو
ودنقر للتراب
هم فوق هم همـة
صنقع للسما
وكان فى الجو
فى غيم
وكم نجمات بعاد
وكان الدنيا صيف
لا قالتو كيف
كيف اصبحت كيف
لا لمسة حنان
لا لمسة وداد
لا رمشة طريف
من قلبا وفى
زى ايام زمان
ايام الدفى
***********
كانت ماهـا فى
كانت فى المراح
شدتـلـو الحمار
تحلب فى الغنم
لى شاى الصباح
والطير ما نضم
ما رسل نغم
عم عبد الرحيم
اتوكل نزل
فى المشرع لقا
زملان الشقا
الجا من الجريف
الجا من الجبل
عل الناس بخير
صبح هاظرم
نقنق ناقرم
غاظوه نعل
وعم عبد الرحيم
ما بخبر زعل
كل الناس هنا
ما بتخبر زعل
تزعل من منو
وتزعل فى شنو
كل الناس حنان
كل الناس صحاب
كل الناس اهل
والماهم قراب
قربم العمل
الطاق اليطق
عشت ابو الزمل
بالحالة العليك
بالفال بالامل
**********
عم عبد الرحيم
كت فتاح فى يوم
فى ايدك تنوم
على كيفك تقوم
لا دفتر حضور
لا حصة فطور
تقرع بالقمر
تزرع بالنجوم
لكن الزمن دوار آ بدوم
عم عبد الرحيم
ماشى على الشغل
فى البال القديم
اتعارض تكل
تنشايح جراح ..
يا كيف الغسل ؟
الدنيا ام صلاح
تبدأ من التكل
من حج الصباح
فى حق الملاح
فى اللبس الجديد
فى القسط القديم
وبيناتن عشم
فى الفرج البعيد
***********
امونة الصباح
قالتلو النعال
والطرقة انهرن
ما قالتلو جيب
ما قالتلو جيب
شيلن يا الحبيب
غشهن النقلتى
والترزى القريب
بس يا ام الحسن
طقهن آبفيد !!
طقهن آبزيد !!
انطقن زمن
وان طق الزمن
لازمك توب جديد
وبى اية تمن
غصبًا للظروف
والحال الحرن
شان يا ام الرحوم
ما تنكسفى يوم
لو جاراتنا جن
مارقات لى صفاح
او بيريك نجاح
ده الواجب اذن
وايه الدنيا غير
لمة ناس فى خير
او ساعة حزن
**************
عم عبد الرحيم يا حر
ماكا حر
ياريت التمر
يا ريت لو يشيل
كل تلات اشهر
والله ايام زمان
كانت ما تمر
كان ما جاك هوان
ما لاقاكى ضر
كان لا ضقت ضيق
لا اتغرغر فقر
لا شابيت غريق
لا طلوح صبر
وكان ما كان وكان
كان اكسيكى در
*******
حيكومات تجى
وحيكومات تغور
تحكم بالحجى
بالدجل الكجور
ومرة العسكرى
كسار الجبور
يوم باسم النبى
تحكمك القبور
تعرف يا صبى
مرة تلف تدور
ولا تقول برى
او تحرق بخور
هم يا الفنجرى
يا الجرف الصبور
كل السقتو ما
باقى على التمور
وارضك راقدة بور
لا تيراب وصل
لا بابور يدور
والماهية اف
عيشة هاك وكف
فى هذا الزمن
تب يا دنيا تب
فى هذ الزمن
تف يا دنيا تف
يا العبد الشقى
ما اتعود شكى
لكن الكفاف
فوقك منتكى
والسوق فيك ياسوق
حالا ما تسر
الا كمان فى ناس
فايتاك بالصبر
ساكنين بالايجار
لا طين لا تمر
واحدين بالايجار
ما لا قين جحر
سلعتم الضراع
والعرق اليخر
عمال المدن
كلات الموانى
الغبش التعانى
بحارة السفن
حشاشة القصوب
لقاطة القطن
الجالب الحبال
الفطن الفرن
الشغلانتو نار
والجو كيف سخن
فرقاً شتى بين
ناس عيشا دين
مجرورة وتجر
تقدح بالاجر
ومرة بلا اجر
عيشهم كمهو
ديل شوف كمهم
وديل شوف هان قدر
*********
وناسا حالا زين
مصنع مصنعين
طين فى طينو وين ؟
ما مرابو مر
بارد همها
لا بعرق جبين
لا وشا يصر
عين والله عين
كلها كمها
عزها هان قدر
دى الجنة ام نعيم
الجنة ام قصر
يا عبد الرحيم
الا ورا القبر
يلكد فى الحمار
لا تسرح كتر
وان كان الفقر
يا عبد الرحيم
اشبه بالكفر
***********
حكومات تجى
وحكومات تغور
تحكم بالحجى
بالدجل الكجور
ومرة العسكرى
كسار الجبور
يوم باسم النبى
تحكمك القبور
تعرف يا صبى
مرة تلف تدور
ولا تقول برى
او تحرق بخور
هم يا الفنجرى
يا الجرف الصبور
كل السقتو ما باقى
على التمور
وارضك راقدة بور
لا تيراب وصل
لا بابور يدور
*********
نقرط للحمار
نقريط الحمار
لا تنسى النعال
الطرقة ، الخدار
اللبس الجديد
تسريح السفر
للماشى الصعيد
ماشى الديش نفر
والبــال اشتغل
والبال اشتعل
ب الابا مايعيد
الحول ما اشتغل
الغبن الشديد
السابة ورحل
الضيق المحل
الفرج القريب
الجا وما وصل
زى الحال دة يوم
لا كان لا حصل
والبال اشتغـل
*************
السكة الحديد
يا عم القطر
يا عبد الرحيم
قدامك قطر
وسال الدم مطر
وطارت دمعتين
وانشايح وتر
يا طاحن الخبر
ما بين القضا
ومرحاكة القدر
الشهدو الدموم
و الدمع الهدر
ايدهم فى التراب
والعين فى القطر
عارفين الحصل
عارفين فى حذر
الخبر اليقين
بوخ وانتشر
اطفال القرى
وعمال الحضر
ادوهو الطيور
ودنو البحر
انصاع السحاب
وادفق مطر
عم عبد الرحيم
فى الشارع عصر
لى تالا اليسار
متفادى الكجر
عربية الكجر
دوية الكجر
جفلت الحمار
وطوح زى حجر
وعم عبد الرحيم
اتلافا القطر
فتاح يا عليم
سال الدم مطر
جرتق بالتراب
منشور بكتاب
روشتة وجواب
ماهية شهر
مفتاحا قراب
اورنيقين سهر
جم لبدة حمار
مقطوعين ضهر
عم عبد الرحيم
يا كم من بشر
عم عبد الرحيم
يا كم من بشر
صحى الموت سلام
ما يغشاك شر
صح فى الموت سلام
ما يغشاك شر
**********

آه يا غبش

ما عندي ليكم غير نغيم

برجوه ينفض لي غبار زمن القسا الكتاحة
يهز عرجون نخل صبر الغلابة الطال

يحث يخرتتباريح الأسى الممدودة فوق نور الدغش
يا نورا آه
يحرد كنائسنا المسيح

يعرش مدارسنا الصدى

ييبس يباس
حلق العصافير الوديعة من البكا

إندرد الصوت البعيد

أسيان تصر من دون صدى
ينكفرن الفجر الصبوح

يحمي الزهيرات الندى
تختا الدراويش الضريح

يسكن خلاوينا الجنون

يهجر جوامعنا الإله

يا نـــــــورا آه
تطرح غيوم الشوق تئن
تشرق
تموت
خيل … كلمة الحق التناهد في الشفاه
يعقر بسيمة الصح مع لوبي الجروف
تغرز ضريعات الحروف
ينشف مراح الأمسيات
تتمطق الأرضة المروق والأغنيات
اللي الشروق والأرض
والحب ... والمطر
تضهب تتوه
وكتين يضيع عرق الجباه الشم

شمار في مرقة
من دربك التور نفس خيل الصبر
فتر خطاوي الشوق وراه
يا نورا آه
ساعة الشموس الغر تهضلم

تلحق الصح في المغارب
تدفر الضو الكهارب في وشيك

تدفر المدن الضبابية

السرابية الكآبة
وحائط التيه والطشاشات فوق قفيك
يا ام عوارض

مو دعاشة
ماها شبورة وتقيف
جاي ليك يا نورا غيمة
تملا ماعونك خريف

يملا عينيك ويفضل
يروى جواك العطاشة
مو دعاشة
يا نفس فجر القصائد

يا بلادي القطع قلب الروادي
باللواج الجاي وغادي…
ده ماهو صوتك
لاها صورتك…دي البترقش
نادي فوق صدر الجرايد
ماها صورتك
لا هو صوتك
لا ها صورتك
إنتي يا الفي إطن الصحاري
شفع العرب الفتاري
البفنو الشايلا إيدن

ويجروا كابسين القطارة

يجروا باريين القطارة
لا سراب الصحراء موية

لا حجار سلوم موائد
إنتي في الغابة اليصارع

جوفوا للآهات تلكي
ياما دفق غيم رجاهو

لكن الأيام كركّي
في خلا حالنا اليمحن

ويملأ بالسهد الوسائد
إنتي غيمة
شديرة خيمة
إنتي جاهنا
والتقا الطلقت وشينا

فرقت غمة جباها

فرجت في الحارة ضيفنا

فرحت شفع فريقنا
يا النغيم البق فينا

وشد لي وتر إنتباهنا
يا تباشير
يا بشارة
إنتي يا ضرعاً تكرمش

شان يرضعني الجسارة
إنتي في منفاي رفيقة

وفي حشا الأشواق حرارة
يا هدى الناس الحيارى

يا ندى الفجر اليبلل

صور عوينات الفقارى
جاي ليك
يا نــورا آفة
آفة للسوس الجا ينقر
عود عشيماً داخرو فيك

وأصلي لمن أدور أجيك

لا بتعجزني المسافة
لا بقيف بيناتنا عارض

لا الظروف تمسك في إيدي
ولا من الأيام مخافة
يا نفس فجر القصائد

ما ضهب في بعدي عنك
واصلي متغرب عشانك
راضي بالبيجيني منك
ما بكيت شح الليالي

لا شكيت نح

شلتو حالي
رغم إنو الحال بيفسخ

إلا كت في الحارة بنده
يا وطن عز الشدائد

مكتوبة في الممشى العريض
شيلة خطوتك للبنية
مرسومة في الممشى العنيد
في زمة الحاضر وصية
شاهد التاريخ والسير والأنتظار
أدوني من قبلك مناديل الوصول
وفردت أجنحة العشم
في ساحة الوطن البتول
وضحكت ما هماني شي
وبكيت ولا هماني شي
وعندك وقفت من المشي
وغرقت في ضو النهار


وبالمناسبة أخي سلاويyour cat is so cute

المشاركة الأصلية كتبت بواسطة سيمون

وبالمناسبة أخي سلاويyour cat is so cute

معتوقة ومعتقة ومنعتقة

نوافير إنتشى وحشمة

وحمار العين

تضحك كلما وقعت مصيبة

تمشى على العجين و تلخبطو

ترطن إذا جاها الحنين

يا بت بيوت الهجعة كيف

غبار شوارعك ماشى وين

زقاق يعيش في زقاق

كتمة وظلمة وإنعتاق

وكتب ليك لا بينى بينك ريده لا قصه غرام

واخترت ليك اجمل حروف واصدق فواصل نادره فى لغه الكلام
لا قصدى الهوا معاك بى الحان غنى لا شعرى ليك مرجيحه من شعر الغمام
وكتبت ليك وانا جاى من زمن الشقى المرسوم على وش الثوانى مظلله
تتمدد الساعات سنين تتفتح الاحزان غريبه ومذهله واشتاق افتش لى نسمه فى الزمن العذاب وايامى من كتر الاسى
و كتر العزوب
والاغتراب صارت حروف مترهله
لحظات اسيفه ومهمله
ووقف ليك لمن لقيتك جايه فى قلب الطريق ولمحت فيك راحت المشاوير البعيده
ولفحة النسمه الحنينه الجايه من جوف المضيق حسيت
عجايب الدنيا اتلمت بقت جايانى من عصرا سحيق عينكى حس اطفال بينادوا للقمر الغايب يعود وجبينك الضواى حجى الحبوبه فى الزمن السحيق
يا قمرا اقلبى السنن الحمر شوقى شليل
ما جا وانا فى قساوة الموحش الزمن البعيد
انا حيلتى ايه قول لى ياقمر الزمان
غير ابتسم واحلم معك واحضن اماسى الصحوة والامل القريب
والله يا قمر الزمان شان جيتى بى زمن المحنه وشفت فى عينيك حس اهلى القدام كتبت ليك

تحياتى للجميع ........
مشاركة منى اقدم اغنية للراحل المقيم مصطفى سيد احمد وهذه قطوفها :

عارفنى منك لا الزمن يقدر يحول قلبى عنك
لا مسافة ولا الخيال يشقينى منك
عارفنى منك
تحرمنى منك والمواعيد لا تجيب منك تودى
لا الشجن قادر يشيلنى عليك اعدى
لا التحايا ولا المشاعر الحية فى جوة الحنايا
لا رسالة تجينى منك لا خبر طمنى عنك
وانت ساي يكفينى ظنك رغم انك انت عارف انى منك
لا الزمن يقدر يحول قلبى عنك
ولا مسافة ولا الخيال يشغلنى عنك
يبقى بعد فى الاسى
وتبقى انت الظالم القاسى النسى
وغصب عنى ازيح ظنونى واقول عليك انت المسامح
وفوق شجونى اعيش زمان بالفرقة جارح
فوق شجونى
وفى احتمالى وبالى انك
انت ساي يكفينى ظنك
رغم انك انت عارف انى منك
لا الزمن يقدر يحول قلبى عنك
لا مسافة ولا الخيال يشغلنى عنك
يا هوى الحزن الدفين
خليك على الوعد القديم
خلينى فى الشجن الاليم
وابقى فى كل المدائن
سكنى وسفرى الجحيم
تبقى ايه الدنيا بعدك اكون
ما فى احتمالى وبالى انك
انت ساي يكفينى ظنك
رغم انك انت عارف انه منك

ماني غرقان في التمني
ولاني سارح بالأماني
زارني خاطراً بلّ شوقي وإحتواني
النخل إتلاقى غنى
وردد النيل الأغاني
النجوم لامع بريقا
الورود النايمة فاقت
عطرت كل الجزاير بي رحيقا
الندى الراقد بفوقا
صفّقت جنحاتو غنت لي هوايا
دقوا مزيكة الحواري
رقصوا البنوت أعرضوا
النخل زايد في عرضو وفي علاهو
البيوت غرقت وراهو
وبرضو زايد في علاهو
يحكى للدنيا الجميلة
سر عظمتو وسر بهاهو
ضى عيونك يا بنية
يضوي من بلداً بعيدة
تحملك لينا الغمامة
ويكتمل للروح نشيدا
وفى الدروب الليك تودي
بنسرج الخيل العنيدة
والحزن من نور عيونك
يلبس الفرحة الجديدة
وأنا راكب يا مراكب
لا الرياح توقف خطايا
لا الجبال تحجب رؤايا
ست شموس الكون منايا
ليك مسافر
ومن كتير الزاد مسافر بي غنايا
نوصل الشمس البعيدة
نبقى عيدا
نزرع الحب البيوقد
لي النهاية

من بعد ما عز المزار والليل سهي
وملت نجوموا الانتظار
والشوق شرب حزن المواويل
وانجرح خاطر النهار
وبقيت أعاين في الوجوه
واسآ ل عليك وسط الزحام
قبال آتوه أمكن ألاقى البشبهك
ما الليل براح والشوق تعالا بيندهك
شايلاه وين النيل معاك ****
عصفوره جنحات النجوم
وآنا بي وراك
بسآ ل عليك في المنفي في مرف السفن
بسآل عليك مدن مدن ***
واعصر سلافة الليل حزن
*****
مانحن بينا الأمنيات والتضحيات
بينا المعذات والعذابات في الحياْ
بينا الهوي واخلاص علي قلب انكوي
وكلام كتير قلناه آخر الليل سوى
لكن كلامنا الكان وكان خايف يكون شالو
الهـــــــــــــــــــــــــــــــــــــــــوي
*************************
*************************
دفناك ثم نسيناك****
ليس لانك لم تكن عزيزا علينا
ولكن لانك رحلت في زمن كان الموتى فيه يفرحون
بالرحيل ******
إليك المقيم الراحل ::::
*******
مصطفي سيد احمد المقبول

وإصطفيت جرحك براك
وتر إنتباهك والنغم
ضفة تزرع فى الشروق
وضفة بتقاوم الألم
شمعة الأمل التهِد
ليل الكوابيس زمن الودار
شامخة بتعاند فى صدى الليل
الهياج الإحتضار
*************
صاح إنتباهك فى الزمن
لما أصطفاك
قدر العصافير .. الرحيل
غدر الشِباك …
شوك المتاهات .. الدوار
تحتك نسيج الليل .. طويل
للأناشيد الماخدة
من حـِزم الشعاع
نار البدايات البتول
للسحابات التلوِّح قوس قزح
بُشـْرَة هطول
ولى ضِيا القمر المقرّح
ضد قوانين الأفول
*******
وليك يا آخر الخيول
فرس الرِهان الما كبا
وهج الشموس الإشتعال ..
وإنكسار المستحيل
شقيتو بى سيل الحروف
الطالعة دابا من الصدف
.. مجرى البحر
تيارو والموج الرجوع
أديتو حيل مدّو الزمان
كان إنحسر
غيرت فى الزمن الملامح
طعم الكلام .. لون الغُنا
وطبع البذور .. كيمياء التراب
طقس المطر
***********
صاح إنتباهك فى المكان
زهو السنابل بالقموح
وإجتراحك لى لسان لغة الجموح
وكتين يتوه بين السكات
سيف القيود .. الإرتهان
شمس الحقيقة .. الـ .. آه ..
بقت منفى ونزوح..
وأقتباسك للصبر لغة اليقين
بإنقسامك فى الزمن
وإنصهارك ..
وإقتسام الآهة بينك والمحن
وإنتصارك لى صباحاً بكرة طالع
من مدارات الصهيل
يا صباحك..
لما تنداح ضفة جراحك .. بالشجن
وتقلِد الزمن العديل
يا جراحك..
لما تفرد غيم جناحك
فوق عذابات الوطن

[color=red]سني علي النضال أيدي
ودوق بالهتاف فمي
شوارعك لي دويها علي
إذا ما أخر العلاج الكي
مراويد حمر يمي
إذا ما أخر العلاج الكي
مراويد حمرحمي
هردت لهاتي بالغنوات
وقت يبرد حشاك يمي
من التعب البلا صالح
تفيقي تروقي تنجمي
تسو مكانسك المطره
تضو ألبيك تنحمي
تمرقي صبوح للجيران
قدح فوق ايد وايد المي
يلاقوك شفع الكتاب
نطا ف وظراف بلا النسمي
يقنولك غناوي الساب وفي بيوضه
مافي سراب
جبال كجمي وفيافي الكاب تفيض بالخضرة منقسمي
فياف الصي بيوضه
مراسيك فيها مفروضة
خدار يراري شوف عيني علي الأبواب
طواريها قماريها حواريها
بقت روضه بقت تشرب من الحماداب
تشوفي رهاب بعد نجمي
اشوف قريب قرب نضمي
اشوف العالم التحتاني
هيلا هوب وقف ناهض
أشوف العالم التحتاني
هيلا هوب وقف ناهض
وهد عمائد الفوقاني
جو الجوب رمي العارض
وهد عمائد الفوقاني
عريق الحب نبض قابض
مثل قبض الحروف باسمي
غناوينا القبيل رقاق
عليها تصب برد قا رص
وجر يمي
ادوب لهاتي بالقنوات عقب يبرد حشاك يمي
وطني ولا ملي بطني
سكاتي ولا الكلام الني
قليلتي ولا ذبائح طي
قليلتي ولا كتر سمي
سلام يمي سلام يمي
سلام لا هكمي لانكمي
*************************

دفناك ثم نسيناك
ليس لأنك لم تكن عزيزا علينا
ولكن لأنك رحلت في زمن كان الموتى
فيه يفرحون بالرحيل
إليك المقيم الراحل
مصطفى سيد أحمد

في عيونك ضجة الشوق والهواجس
بيهو بي جية النوارس
في عيونك ضجة الشوق
ريحة الموج اللي بنحلم
ياما شال زفة خريفك كل عاشق أد فرضو
والصباح أمتدا ياما كل ما جاوبتي نبضو
مافي شمسا طعمة طلت ألا تضحكي ليها برضو
في عيونك ضجة الشوق والهواجس