منتديات قرية عمارة ( البيت بيتك )

منتديات قرية عمارة ( البيت بيتك ) (http://www.3amara.com/forum/index.php)
-   المنتدى الثقافي (http://www.3amara.com/forum/forumdisplay.php?f=45)
-   -   صالون الشوايقة (http://www.3amara.com/forum/showthread.php?t=15266)

اشجان 05-01-2008 06:02 PM

مشاركة: صالون الشوايقة
 
حبل الصبر - صديق أحمد


تلب أمسك حبل الصبر خلو قلبك لا يبقي ني
أصلو ود أب زيد كل يوم من بلدنا يرحل جدي
شن بسويلك عاد أنا القبلك الحرمان مر بي
والضنا الهسا عليك زاد من زمان أنا زايد علي
كم حبيبا شغل الفؤاد في العيون كان متل الصبي
حل بي (توفيق) السواد مافي زول قال كفاره لي
أرقى يا تلب ودعت قبلو كم قمره منوره
وكم تحف نادرات سافرن وكم فراشه وكم جوهره
وكم قلوب متلك بالفراق الأنين والشوق سهره
شوف عوض عبدون الحروف خل من باطنه ظاهره
يا عوض مدرسة الشعر بي جداره إياك ناظره
بي غناك حرف السين بقت فوق بنات جيله مبطره
سابك اللى بلد الجليد ودعك ودقّ مغادره
يا قلب مالك انجرح ولسه ليه جرحك مابره
أما أنا المسكين الطروف غرزت في أظافره
وين غناي لي شتل الجروف والجناين وأزاهره
أسألوا الدرويش عن صديق عمرو كم جمرات عاصره
خلو يحكيلكم عن حياه النجيفى الهو معاصره
الككر يا رحمن زمان ضاع مع العشاق شاعره
مانفع تغريدو الحزين ما نفع صدق مشاعره
جننو (البتوفيق) رحل وهام ورا القام بالباخره
خلا دنياهو فرندقس ما عرف أوله وآخره
أرقى يا رحمن في السماح مافي بلداً بتجاكره
الله مديها سماحه صاح من كروها ولى تكره
أصلو ود أب زيد معترف بي جريمتو ومو ناكره
كلو جور القال سفروها وقطع ليها تذاكره

اشجان 06-05-2008 07:43 PM

مشاركة: صالون الشوايقة
 
البنوك ... ( ود اليمنى )

البـنـوك فــى كــل شــراع شغـالـة بــى فـعـل الـمـضـارع
ومــا بتسـاعـد للـمـزارع الـدقـون فــى الـسـوق تـصــارع
لا ضمـيـر لا حـتـى وازع شـعـب يبـحـث عــن كـــوارع
رومــــــــــــه مـــــــــــــن خــــرفــــانـــــو طــــــالـــــــع
كـلــوا زول شـايـلـوا سـبـحـه الـدقــن دايـرالـهـا مـسـحــة
الــكــرش دايـرالـهــا زحــــه لـعـبـايـة الـفـوقــه طــرحــه
الـبـلـد ماسـكـاهـا قــرحــه لا فــــى صــحــة لا مـصـحــه
عـاســوا للـقـانـون عـواســه الـبـتـر مـــن غـيــر دراســـه
بعـض ناسـا قطـعـوا ايــدا وبـعـض نـاسـا قطـعـوا راســه
بـعـض نـاسـا فـــى الـحـراسـه الـدقـيـق والـزيــت اغـاثــه
الـغـنــى يــدوهــو اردب والـفـقـيـر مــــا يـلـقــى طــاســه
انتو تجروا وبي وراكم نحن نجرى وللوراكم ما بتفكـروا
تلقـى نـاس قاعديـن يذكـروا بعـد شويـه يقومـوا يسـكـروا
انتـو جـاريـن بــى لسـاتـك ونـحـن جـاريـن بــى حـداشـر
انتـى فـى الطابـق الحداشـر ونحـن فـى الحـارة الحـداشـر
انـتـو توصـلـوا مــن تـلاتـه ونـحـن نـقـعـد لـــى حـداشــر
الـفــرق بينـاتـنـا شـاســع انـتــو ماسـكـيـن يـاتــو شـــارع
انــتــو حـارسـاكــم مــدافــع ونــحــن بـالـيــل أى شــافــع
يـقــوم يـكــورك يـمــه يـابــا ويـمــه شالـتـنـى الـعـصـابـه
وبــــــــــــــــرضــــــــــــــــو تــــــــــــــــجـــــــــــــــــرو
كـــل نـائــب عـنــدو دائـــرة واى واحـــد عـنــدو دايـــره
الحقيـقـة الدنـيـا دايــره وفــى الـجـنـوب الـحــرب دايـــره
محمد احمد مرتو دايره وبتو دايره والقيم فى وطنى دايره
وبــــــــــــــــرضــــــــــــــــو تــــــــــــــــجـــــــــــــــــرو
القاعـة بـاردة وبالمكيـف ونـاس وراء الباصـات تصـيـف
شــــــعــــــب فــــــاضــــــل لــــيــــهـــــو يــــخــــتـــــف
اليـشـوف كبريـتـه يـرجـف واليـشـوف صـابـونـه يـهـتـف
مــا ده شـعـب الإنتفـاضـه شـوتـوا بــي فــوق الـعـراضـة
ومــا اظــن الشبـكـه شـافـه ومــا اظـــن قـــاس المـسـافـة
وشــــــاتـــــــه بـــــــــــــي فـــــــــــــوق الـــكـــشـــافــــه
كــل نـائـب ادو قطـعـة وقطـعـة ناصـيـة ودرجــة اولـــى
وكـــل كـيــال لـيـهـو فــولــة الـحـكـومـة الـتـمــه حــولــه
تـزغـردولا تفرتكـوهـا تشـبـلـوا لـــى لـلـطـرف البـنـاتـف
والـبـقــيــة تـرجـعــوهــا والــبــلــد مــلــعـــون ابـــوهــــا
الرايه فوق القصـر شامخـه الرايـة برضـو كمـان جريـده
البنـوك مسـكـوا اقتصـادنـا ونـحـن جيبـنـا عـلـى الحـديـده
الـنـمــر مــركــوب ويــرقــش سـبـحــة لالــوبــا غـلـيــده
الــدقــن بـالـحـنـه تـلـمــع راكــبــه مـرســيــدس جــديـــده
وناس تكابـس فـى العصيـدة وانتـو تضربـوا فـى الكويتـى
حمداحمـد ونـاس بخيتـى ياكلـوا عيـش ماسـكـه الهريـتـى
ويــا عصـيـدة فيتـريـت انـتـو تاكـلـوا شـيــه وكـبــده نـيــه
ونـحــن راجــيــن الـضـحـيـه يــــا لـقـيـنـا ويــــا عـدمـنــا
ومـافــى صــابــون لـهـدمـنـا انــتــو ســكــان الـصـرايــه
قـولــوا لـيـنـا شـنــو الحـكـايـه جـبـتـا وريــقــه ودوايــــي
وجـــــيــــــب لــــــــــــى قــــرطــــاســــة مــــحــــايــــي
انــا اصـلـى محـتـاج للكتـابـى ويـــا حلـيـلـك يـــا تـرابــي
واخـرابــك وا خـرابــي ونـــاس تـكـابـد فــــى الــروابــي
وتــــلــــقــــى شــــــافــــــع لادغـــــــــــــو دابـــــــــــــي
ونـاس وراء الباصـات تشابـى مــن الكلاكـلـة وللصبـابـى
ونـاس يـوردوا فـى الكبابـى ونـاس يحنسـوا فـى الترابـي

ام وسن 06-05-2008 10:38 PM

مشاركة: صالون الشوايقة
 
اشكرك اشجان لتحريك هذا البوست المحبب
واصلي انت ونستمتع نحن

Fawzi Salih Wahbi 07-05-2008 12:44 AM

مشاركة: صالون الشوايقة
 



أُم وسَن ...

الحمد لله على سلامة العودة للصالون ... والحمد لله على سلامة الإبن محمد ... وما تشوفوا شَر ....

اشجان 10-05-2008 12:18 PM

مشاركة: صالون الشوايقة
 
عشان خاطر عيونك ديل افارق حلتي وطني
اسافر من بلاد لي بلاد كمل صبري وراح بدني
اضوق المرة واتغرب واكون مجبور اشد رحلي
وافوت ناسا حنان طيبين واقوت مرتع صباي واهلي
اشيل الزاد غنيواتن اردد فيها من جهلي
كلامه يقول انا الراحل وجاييك بكرة يا املي
جاييك يا غرام الروح لو حتى السنين دار تابة
وجاييك لو سنيني تدور وتدوس امالي انيابة
وجاييك لو يطول الليل ولو يبقى الوطن غابة
جاييك قولي لي كيف انساك وانا السافرته عشان عينيك
فت درب الوطن والعزة والحله المنورة بيك
فت امي وقليبه الحاني وحاجات تاني خافي عليك
وانت لا تشغل قليبك بيها ما دام الصحاب حوليك
قول لي يا حبيب برجاك لو حتى اغترابك طال
وقل لي ما بخونو هواك وما بسمع كلام عزال
وقول لي غير غرامك انت ريد يشغل قليبي محال
وطمن قلبي يا مريودي باقي الغربه زاته نضال

ام وسن 10-05-2008 05:12 PM

مشاركة: صالون الشوايقة
 
انت مافي

بهجت الأيام تصافـــى وقمّة الالام تجافــــى
وعــن عيونك يا حبيبى ماب تعوِّضنــــى القوافى

يا ضــرايا المافى وينك من زمن نضب إصطبارى
والسفــر كمّلت زادو وانت ما عُد فــى انتظارى
الســراب أصبح بساطى وتوجت عطشى الصحارى
وشويمت فوقــى الدرادروزفه من أيام ودارى

كنا فــى يوم داك أحبّه يا بعيد لــــو كنت فاكــــــر
كنا سابحين فــى الأمانى بالحنان والمـــرفأ باكــر
شلنا شوق الدنيا كلـــو وبات صدى إلفتنا ظاهـــر
فجأة إتنصّلت عنـــى وابيت بالأسباب تجاهـــــر

قولِّـــى وين جنّة وعــودك وين تلاقيك وانسيابك
وكيف حنان الـــروح وجودك عدّ فــوق الصَّد رِسابك
وسابنــى فوق قيف لهفه باكـــى شاكــى من نيران غيابك
وحالتى كلِّـى وفاء ومحنّه وريده فــى خضرة شبابك

غاب معاك سعدى وهنايا وعشت من بعدك ضياعـــى
وقلبــى ما القلب البعاتب ... العتاب ما ليهو داعـــــــــى
يا العلب صِعِب وداعــك وهان عليك يوم داك وداعــى
ما جنيت غير انــى ردتك ولامـــس الأشواق يراعـــى

القليب يقّنتو منّك واحتفظ بالذكـــرى بالـــــــى
لو تعوِّض قلبــــى عنّك او تقصِّرلِـى الليالـــــى
وقدر ما طالت بِــى اهه فوقه علِّيت إحتمالــــى
إلا صوت أشعارى لاها واستجاب غنّاك خيالـى

انت مافــــى

ام وسن 10-05-2008 05:13 PM

مشاركة: صالون الشوايقة
 
كلمات الأستاذ /
خليفه عثمان خليفه
باب الرجال

جيبي موسك وشرحّيني
وقطّعيني حتت صغار
وأكمديلي عيوني شطه
أملي كل أحشاي نار
وكهربيني ومدّديني
علي القضيب تحت القطار
وجيبي فندك وفندكيني
وضرّي ذاتي مع الغبار
أصلي كايس الموت بنازع
من بقيتي توقفيني
علي محطات الترقب
والحذر والإنتظار
ولاهو داير الموت يجيني
ولاني قادر أخب عليهو
عن طريق الإنتحار
قبل أريدك بي قلب زهر البنفسج
ويبكي يتعلق قليبي
يحاكي شفّعنا الصغار
إغتسلت وإعتصمت ف الف غار
وناديت علي ريدك تعال
وشلت سكيني ومشينا ورا الجبال
ريدك فتح صدري ونزع
أي مثقال ذره ميل
لي سواكي يابت الحلال
وإبليس حقد صبغ السحاب
بي دمي حار
وأهدي الشمس
قال ليها البسي للمغيب
اَخر النهار
دايرني شان أحقد عليك
كلما أشوف لون الحَمَار
وبدل يكون البينا ريد
البيني بينك يبقى تار
قلبي البريدك
مابفرط حتى لو كان ف الخيال
بعدك قفل باب الحريم
ما أدى لي غيرك مجال
وكل البنات الجن وراك
دخلنّوا بي باب الرجال

ms.mona 10-05-2008 11:13 PM

مشاركة: صالون الشوايقة
 
أكتب ليك واطّول في كتاباتي

يفيض احساسي وأملأ الدنيا بكلمات خطاباتي

بجمع ليك لغات الدنيا واكتب ليك

وبي لغة العجم مرات...... وبالعربي الشديد وفصيح

وبي لغة الملائكة احيان... والسرياني والتسبيح

وبي كل ذرة في ها الكون...اكتبها ليك وأرسلها فوق جناح الريح

أكتب ليك في الأشجار

علي الأزهار

وفي الأنهار

محل ما تمشي قدامك ..تلاقي حروف رسالاتي

لأنك انتي في زاتي ..ومن زاتي ..يا زاتي

ومهما كتبت ما بقدر اعبر ليك عن الجواي

مهما طاوعت اقلامي كلماتي

اكتب ليك

ام وسن 11-05-2008 09:08 PM

مشاركة: صالون الشوايقة
 
مشكورة مس منى على مشاركتك الجميلة ونطمع في المزيد

عشان خاطر عيونك ديل افارق حلتي و وطني

اسافر من بلاد لي بلاد كمل صبري وراح بدني
اضوق المرة واتغرب واكون مجبور اشد رحلي
وافوت ناسا حنان طيبين واقوت مرتع صباي واهلي
اشيل الزاد غنيواتنً اردد فيها من جهلي
كلامه يقول انا الراحل وجاييك بكرة يا املي
جاييك يا غرام الروح لو حتى السنين دار تابة
وجاييك لو سنيني تدور وتدوس امالي انيابة
وجاييك لو يطول الليل ولو يبقى الوطن غابة
جاييك قولي لي كيف انساك وانا السافرته عشان عينيك
فت درب الوطن والعزة والحله المنورة بيك
فت امي وقليبه الحاني وحاجات تاني خافي عليك
وانت لا تشغل قليبك بيها ما دام الصحاب حوليك
قول لي يا حبيب برجاك لو حتى اغترابك طال
وقل لي ما بخونو هواك وما بسمع كلام عزال
وقول لي غير غرامك انت ريد يشغل قليبي محال
وطمن قلبي يا مريودي باقي الغربه زاته نضال

ام وسن 23-05-2008 10:41 PM

مشاركة: صالون الشوايقة
 
حـــواء
كابى المقنع الجرجار على موية الوجه يا حوا كابيه
وزازى الدمعة منك بى طريف التوب
احزمى حشاك واكربيه
خيراًً ولى مو مدخور ،
رزق الليلة داب الليلة
والباكر تشابى وما بتجيبيه
ويا حوا الوكت مرواح وزمنك راح
امسكى ضرع شويهاتك احلبيه
ليش ماك حامدة ليشن جاحدة
والرزق العليك هطال شربتى التانى فوق بكريه
محمود الغنى ومشكور
غيارك فردة من نسج الكمالى
والتانى توب جاراته بنغالى
ومحمود الغنى ومشكور
وعاجك فضة من دق وتبيد الغالى
ومحمود الغنى ومشكور
نارك موقدة ما عونك ملان مو خالى
ومحمود الغنى ومشكور
وابوزينوبة ناهض فيها ماهو الخملة عنقالى
ومحمود الغنى ومشكور
وأحمد قلتى نور عينيك مختَر
فوق بطان الحلة خوجالى
عصاية الصبينة المكسية بى جلد
الندف والخامة سرهيته
وسرج المرقة سنارى ومسمَر
فوق سراة البانى سنكيتا
وجزلانا مجنزر وطية رزماً
من بطون الطينة مبحوته
ولازم الفنجرة اتبشقت سبع خمسات تصل
حاكت حجول المارقة من بيتا
ومتلفح كساوى الساكوبيس
صوبان وظهرة تقيلة تبرق سنو سوميته
جيداً جيت وجيدلك
حوا بى جنس الجنا القارى
وجيدلك حوا بالولد البعوم الشبكة سدارى
متلك حقو لا تنضامى لا تنلامى لا تتضارى
وانت ولدت للبلد البجيب راس العشارى
عدلك هادو فى كُم الرجال أحمد يمين مقنع ولايا
وفى دارة البنات زينوبة فرقت
منهن فرقة كتيفها من الفداية
عصارى الوردة فوق المشرع
اب مسكا دفق روسن وقايا
وسون قدلة الوز الرطن
صباحى شاقات اب شراية
تبين زينوبة حين تتوقى شعراً كاب
بعد ما انساب على الخد المرايا
عصارى الفزعة والفازعات يجن بكراً تنايا
ويات من تبقى حازمة
التوب على النص القناية
تبين زينوبة حين تتحزم الخصل الشرابهن
صندل الناس الغنايا

شن معنى الكسوف يا حوا
والحزن البجيب ليك الشماتة
وكنزك فى الكنوز زينوبة وأحمد
كل يوم زايدين قيراطين فوق تلاتة
نجوم السعد فوق حجرك تباسم
وانت شارفة ترمى فى ودع البخاته
شتول الفرحة تتفتح قبال
تتمد ليك الليد ومالاقية التفاتة
اقطعى الزند البقودك
من فلاة الخير على بلد الدراهم
واقلبى الطوف إن كسح بك
من جروف الخير على جزر المراهم

يا ديار حوا المراقدك فى رويس عبدلّه وينك
يا المشاوير المشيتك يا المشارع السالكة وينك
بالى فيكى إلا درب العيشة باعد بينى بينك
يا لبينة المغربية النازلة من أطراف سعينك
يا السرابة الحبلى كل الناس تعاين لى جنينك
يا السبايك الساوى شيلك
ولا طويرة الجنة تسكر من مدينك
يا السواقى النايحة زيك
زى حنان اماتنا فى حرقة حنينك
يا بنية طرية طامرة كنوزا بى طرف الطريحة
يا نسيمة رشة باردة تجينى
ساعة اشيّلك موية الصفيحة
يا مليحة
. يا العقيد النام موسد راسه حبات السبيحه
يا صباح الرحمة يا الروح
البتلفى حوارها تمرق من ضريحها
يا حزيمات القمح منشرة فى زمن الحصاد
يا رياح الشتوى هابة على مساجين
المشال بالفرحة والفرج القريب
يا نزيل قمر التمام الحشو
فى شيلتو السناجك والارابيب

يا ولد نقرات تقيك الفى الحصاد
عاقباها بعد المسرة نقرات الدليب

ام وسن 11-01-2009 06:36 PM

مشاركة: صالون الشوايقة
 
ما اجمل واروع هذا الصالون الذي عشعش فيه الطير رغم جماله وروعة قصائده التي تتدثر بالحنية الزايدة والعاطفة الجياشة القوية الصادقة هيا نواصل فيه المشوار
الشاعر الكدكي

يا ولد فتِّح عيونك ديل إنت من تالانا ليه قلبك غَفَل؟؟

إنت مقطوع أصلو ما عندك أهل؟؟

من زمانك في هواكَ تراكَا في لبس البِدَل!!

نِحن لا لُمناكا لا اْتْفَتَّشْنا لي زولاً سعَل

عاد هواكا دا حدُّو لا وين؟؟؟ إن باريتو لي حد ماب تصل!!

كُتْ قبيل بتقول أبوي بي مالو أبوي بي عيشو أبوي سايق البصل!!

وكُتَّ مستَقْويني بي قمحي المنورَق في تقاتو بَلا الجبل

وبالتِمير الفي الجراري مليِّسٍنُّو يشيلنا في ساعة الوحل

وفي فَرِقْةَ الدور ويوم السوق نسَرْبِق منُّو إن غِلا وان نَزَلْ

عاد السني دي مي الكعوبيي!!! أصلو شوَّال ما فضل

مي المطر ضَرَّتْنا فيهو أصبحنا وحلانين وحل

نخَمْخِم فيهو مهرود لي غنمنا الفوق نقِلْبو رحل رحل

وبي تِحِتْ تِحْت امُّو في جاعورتو يِندَسَّ الجمل

أصلو زي دا من الله سوَّاني لا شُفْتو ولا حصل

ولي تَلاتْ ادوار تصيدني المَغَسة لا تِحِت ان نَزَل

وبي تِحِت فوق المِرِق مجدوعة مُلْفَحتي اْم عَبَل

وضارِب شُمَّارتي افتِّح في الجداول، ونَفَسِي قايِم لا مُرُوَّة ولا عَضَل

وراسي دايِشْ بالشَمِش وجسمي يي دا اللِّتْوَكَلْ

والضِرِيس الكُتْ بلُوكْبُو علي العليهو يي دا إتخَلْخَلْ نصل!!!

إن سعَل مني من تالاكَا داير انْشَقَّ طَرْرْرْ من الزعل

كم مشيت للبوستة ودَّر يومي ساكِت وانضَقَل

منَّ الجواب ناسيني ماك طاريني انا الماسك المحل

وانا لي منو اشتِل في الشتِل مي ليكا أريتو عنُّو شَتْلاً ما انشَتَلْ!!!

إن فتَّحت عينك وانعدل؟؟

دا يعجِبْني... وحبيل الوُد البينا اتقَطَع يكون يادوووووووبو بالتيلي اتفتل

أما اْن قصَّر حالِفْ ياني جاييك جاييك زول شَكَلْ...


ورد عليه الشاعر محمد ود حُمد إحمد الشايقي... ممثلاً دور الأُم قائلاً:

يا يابة كُر مالَك عليهو مَزْرْبِقو مَطَرِّي الفشل؟؟

ياهو الوحيد الفي العَقاب راجِنُّنو يستلم المحل

بس انشاء الله يبقى عضِيمو طيِّب مشاكِلنا الكريم يلقالها حل...

أنا نادْهي اهل الضرايح يحفظوهو من الخرابات الهِناك لا يبقى سوَلُّو عمل؟؟

عرَّض لهِن سيدي الحســـن تور الأراك ساكْن الجبل

والروضة بت عبدَرْحمن الجات من الخرتوم وقطرها بالليل وصل...

قالت خيري كان متَعْتع وموووووووو نشيط الحافِضْ الله يادوووووب اشتغل

ياااااااا كَنَّانتو ديك أخَدَر ومخدِّر المولى يدِّيهو المهَل

يجيكَا راجع بالسلامة يفرِّحك وينسِّيك القدم داكاَ الحصل...

البارِح عيني رَفَّت وفي منامي انا شُفْتو جا.. الرسول لا تنْبِشُو ولا تَقْهَمو يومو اليصل

وابْشِر لا تخاف فول الجروف يي دا النِجِض والويكي قَرِنَة إتكسر

والبرتُكان شطورو منَفَخات إندَلْدَلَن فوق الفروع عملنْ تَقَل....

والنعجي بالليل تاومَت واحد في التويمات ينفَع للضحيي طلع حمل!!!

ويا أبو الخزين الدِّنيي أصلها ضُلْ صباح وماب تجيكا علي عَدَل...

وماب تساوي الناس سِنون كارديق واصبُر علي أديك مثل...

واحد تَفَتِّحْلُو الطريق وتشهِّروا تخلِّي ينقز مِتْل الحمل

واحِد تكتِّفوا بالمريد تخلِّي يسِك في القيد مِتْل الجمل

واحد تسقيهو الحَناضِل وواحد تنقِّطلُو العسل!!!

وواحد تمسِك في خُناقو تضايقو في البجي والبَصًل

كدي قوم طلِّق كرعيك ديل وانزل لا تحِت خلي الكسل

واسقي الشِتيلات الجُداد والترابلة يي دا درِبُن نزل

قالو الجدْوَل وسخان قشُّو شابِك داير نضاف وداير عدل....

ام وسن 17-01-2009 04:20 PM

مشاركة: صالون الشوايقة
 
حظى التعيس
أنا مالـــى دون النــاس مســــــــوده أيـــــــــــــامي

لاضــو لــي نــــــــبراس فـــى ظلمـــــه أحلامـــــــي

ليـــه دون خـــلايق الله حظي التعيـــس مســــــود

يـوم الفـــــــــرح طـــــل مــــات قبـــل مــــــا يولــــد

فتحـــــــــت للأحـــــزان وســـــاعة الفــــرح غمـــــد

اتغتــــا بيـــهم أســــاي متوســــــــدة الامـــــــــــى

بـاب السعـد مقفــــــول مـــــا أتلقـــــــا المفتـــــــاح

مـــات الشعــــاع مكتول صبـــح السعــــد مــــــا لاح

لمتيــن معــاي يا غـــول يـــــا طـــــــــارد الأفـــــــراح

كل ما أتفتــح لـــي باب ألقــــــــاك قدامـــــــــــــي

صبحـــاً يشـــــع قـدام طولـــــــــــت أهــــــــــاتيبو

شـــايفاه فــي أحــلام عطرنــــي بــــــي طيبــــــو

يظـهر لـى فجـأة ظـلام جــــــــــــارات جلاليبــــــــو

يكشـحني بـــي أوهـام تحرمنــــــي نســــــــــامي

قدامــي كـــل النــــاس أفراحــــــها مــــــا ونـــــــت

عايشين سماح أحساس بيـــــهو الطيـــــــور غنــــــت

الكــــاس يلاقــي الكـاس ذي مــــــــــا هـي إتمنــــت

عنـــدي الأمــاني يبـــاس مــــــــات القبيــــل نـــــامي

كـل الخطــى الثابتــــات تتماشـــى لـــى قــــــــدام

وأنــا لـو حظيت خطـوات بيردهــــــــــــا الــــــــــهدام

البعــدي عـــدى وفـــات متوســـــــــد الأحــــــــلام

وأنــا مــالي ليــه راجعات طوالـــــــــــــى أقدامــــــــى

ام وسن 17-01-2009 04:21 PM

مشاركة: صالون الشوايقة
 
أغنية وفــــــــــــاء طـــــارق العوض
كلمات الشاعر : الحاج محمد سر الختم
غناء المرحوم ( يس عبد العظيم ) سابقا
الان غناء الفنان ( طارق العوض )


وفاء ليه بتردي المويه انت حرام عليكي تشيــلي

ماكان حقو تملي الباغة شان هي عليكي فاضية تقيـلي

انت الزيك ما بخدمو ضمه الا بس الظـــروف عزيلي

والضيف ان جاء للشايقية رابع يوم وقعت طويلي

وما برضاكي تمرقي بره بعض الناس نفســـو رزيلي

راجنــك تمرقي يشوفو كـيف ايد الله فيكي جميــلي

قالوا المويه من ايديك دوو يشفي الرويحتو عليلي

لوبلقالي منها شربة في السنــة مرة تشفي غليلي

عودك حكمة السواهو زودو فوق ندايدو خصيلي

ضيعو وســوه لي خــوفي ينعقد اوعي تنسي تميـلي

وحيلك كلو في عينيك والايد ما خلق لهاحيـلي

ايديك تتعــبه الهبابه والعين متعيباله قبيــــلي

جاتني امس العشيب لبيه تشكــي من الزعل تشكيـلي

قالت انت شلتي جمالنا خليتي لنا حاجه قليــــــلي

ليه يدوكي بي ماعونو شان زي ماك دايرة تكيلي

وعارفك من زمان يا عيني اصلك نا بتعوسي عديلي

تكشفي حالي للدايرنو ما برضيك شئ غير بهديلي

الشئ قبل لساني يقولو حالا دمعة دمعة تسيلي

لو ما انت شن وراني عينا ناعسه والا كحيلي

ام وسن 24-01-2009 11:18 PM

مشاركة: صالون الشوايقة
 
آخر زمن ... ( عبدالقيوم الشريف )

تـانـي مــا بنـدسـه الخـبـر نـحـن قــدام واقــع مـريــر
فى البنات زي السـوس نقـر يـا خـى دنيـا اخـر زمـن
عـوانـس فــى المجتـمـع ديـــل بـقــن للـبـنـوت عـبــر
قبلهن كم الات سمـاح ضاعـن واخيـر ياخـدن الحـذر
الزواج صح قسمه ونصيب حكمـة ممـا خلقـوا البشـر
بيهو كم عاشقين ضاقوا مر مؤمنين بيهو قضاء وقدر
اوعــه مــا تخـدعـك الـوجـوه المنـديـة مـتـل الـزهــر
تبدو مبتسمه فى الصباح وفى الدواخل عـدوان وشـر
السمـاح ماهـو سمـاح عيـون واقعـه متمتعـه بالـحـور
ماهو عود نادى ومستقيم نامي فوق عز وفـوق بطـر
مــا تـقــول سـمـحـات الـشـفـاه المـنـديـه زى الـزهــر
مــا بتـأكـدوا لـيـك الكـتـوف الـمــردم فـــوق الـشـعـر
مــا تـقـول سمـحـات الشـفـاه الكـلامـن يـهــز الـوتــر
مــا بتـأكـدوا لـيـك الكـتـوف الـمــردم فـــوق الـشـعـر
السمـاح فـى العفـة والديـن القنـاعـه وغــض البـصـر
دي القناعـه وكنـز الزمـان واحتـمـال نكـبـات الـدهـر
البـنـات تابـعـات الـهـوي مغـرمـات باللـيـل والـسـهـر
الغرام بقى بس بي الجيوب والبيـوت والطيـن والمتـر
الواحـدة تتعلـق بالـدروس والمـراوغـة مـنـذ الصـغـر
تنتظر لن تقضي الدروس وتسهى لمن يفوتهـا القطـر
حـتـي كــان قلـتـا الامـهـات الـعـرس سـونــو مـتـجـر
اصبحـن للدنيـا العبـوس وللقـروش سعـرانـات سـعـر
يــا حلـيـل زمــن الابـهـات كـانـوا غسالـيـن للـصـقـر
الزمام صار عند الحريم صار عديل البيع فـى المهـر
فـات زمـان الحـن والحنيـن الفضيـلـة وعـاهـا انـدثـر
لا تهـم يـا اخـوي إن سمـع قالـوا قــام شــوك للعـشر

ام وسن 30-06-2009 01:54 PM

رد: صالون الشوايقة
 
مسخت عوم البترطن في جروفه
آه يا خلايه فجولي اللشوفه
الصدير رجفاته سبب لي خوفه
خام ثمار ال الله قال دانيت قطوفا
الرقيبه قزازة الروم في وقوفا
جرعتني العلاقم بي صنوفه
بروقيها الداره لخبطي لي صفوفا
خلي حسادك عديل تخضع انوفا
ديسه شوف عيني من شكت كتوفا
الا دايما نافره يا ناس ما ولوفا
صممن جاراتا قال لي عطوفه
ملا شوفته لي تشهر لي سيوفا
العلي والبي كلو سبب عزوفا
لو تحلو رموز اصابع اليد حروفا
آه يا خلايا

ياسر العبدلابى 19-05-2010 11:30 AM

رد: صالون الشوايقة
 
شعر الشوايقة من أكثر أشعارنا حنية ويحمل أجمل المعانى فى أرق حروف فاستسمح صاحبة البوست ان اكوع على البوست الى حين حضورها لسان الحال
شعر0حاتم الدابى
غناء جعفر السقيد

معذرة.. لو معاك منى الكلام حـــــره .. معليش الخطاب كاتباهــــــو مضطرة
حـــــــــــرام والله مننـــا إنت تتبرا .. خمسة سنين تفوت تجى فيها فد مرة
وراك أنا كم شقيت وعشت فى مرة .. وتعبـــت مع البطان الهم للعيون غرة
بيخاف الغرق الغاص ورا درة .. قالو أدب الصغار والعقــــدة من خدرة
حليلى أنا الزمن ضى فاطرى ما انفر .. وخمسة سنين غياب مابتحملن حرة
أنا الحاضنة العذاب وآمالى محتضرة.. وإنت الفى النعيم ما خات حساب بكرة
مسكينة التقول فى الإغتراب سترة .. وتتناسى القروش فى يوم تكون ضرة
حليل زمنك وكت عايشنا بالأُجــرة .. يا ريــــت لا عرفـــــــت ولا مرق برة
**********

الكاتما فى جواى كتير متملك الجوف والعصـب.... وما كت دايرة أقولو ليـك لكن لسان الحال غلـب

ما بنسى يـوم ودعتـنا وسافـرت فى غـرة رجـب. ...خلـيت وراك الـدار حـزين يتباكـا والدمع انسكـب

أعذرنى والله العظيـم لو ما الضـرورة أنا ما كـتب.... وأنا خايفـة فى بعـدك يكون الضاع هو ضعف المكتسـب

اليومـة داك ناس البلـــد هنونى شايقيــــــى وعرب.... قالو لى مبروك خير وجاك يكتب سلامــــتو الإغــترب

قالو لى دوب نجم السعد طلاكى من بعـــــد إحتجــب.... يا دوبا بالك يستريح وتنسى العـــــــذابات والتعــــب

فضّلت أحسب فى الشهور قاعدالى فوق نيران لهــب.... صابرة وحريصة على العيال لا بيقو للريح فى المهـب

سديت خانتك مــن مشيت قايمـابو واجبــــى كأم وأب....والأســــرة يضنيها المسير .. وتتهاوى لو ما فيها رب

والله ما بنــــكر جميلك برضـــــــــو لينا ثناك وجب.... موكب هداياك ما انقطع .. كان سترة فى الزمـن الصعب

لابسين وماكلين والنعيم كايلنا فى يوم ما نضب .....وعايشين معيشــــــــــــة المترفين .. طولنا والطبع إتخرب

البيت مفرش بالحرير ومليانة إيدى بالدهب.... لكن خسارة على محل .. عاش سيدو خمســــــــــة سنين عزب

الشى المهم ما قلتو ليك وليهو إنت ما ظنيت حسب.... كبرو الصغيرونين خلاص .. خايفالم الطبــــــــــع الكعب

وصولوها مرحلة الخطر .. والأمن ما زال مستتب.... وانا كتّ قادراهم زمان لكـــــــــــــن بعد كبــــــرو اتغلب

حصلنى قبل الجد يفوت .. دوبنهم فوق العتب.... قبال نحصـــــــــــــــد الخير ندم .. ومابيجدى كان لمت وعتب

خايفالم الطيش فى الدروس .. ومابرضى لو واحد رسب.... خوفنى المتعبنى الكبيـــــــــر بعدين يمرقو بلا أدب

وريتك الحاصل على لا فيهو ثورة ولا غضب ....شان الحديث مايبقى نى .. والواحــــــــــــــــــة يكتنفا الجدب

أنا قلبى مازال لسة حى .. ونجمو الملاهج ماغرب..... وآخر كلامى ترد على .. لا أبقة بكـــــــــــــرة أنا السبب


ما كنت دايــــرة اقولو ليك .. لكن لسان الحال غلب ..
حاتم ألدابى

ام وسن 26-03-2011 01:17 PM

رد: صالون الشوايقة
 
غناء ود النصري

( جواب أول )

باسم الحاضر والمستقبل
ست الدار بت أحمد قالت :
ليك يا الزين ود حامد شوقنا
أما بعد ،
المبعوتة المنك .. وصلت
ورُح فكيت الطلب الفوقنا
باقي الدين يا الزين خلصتو
قدر الفاضل .. مصروف راشد والتومات
والجايات من جاي .. لا جاي
زي ما قت لك قبال ده
شهر إتنين حا نطهر راشد
شهر إتنين المدرسة تأجز
الله يبعد العارضي تجينا
وراشد حالف ما يطهر
إلا أبوهو وعمتو تحضر
وإلا يجيبو الغنايين
شان الشوق بت سرنا ترقص
قلنا نجيب المداحين
طنطن .. أنا جاي من الحج
وعارف راشد لما يطنطن
كل الدنيا الفيي تطنطن
غايتو بشر .. بس ربو يهون
ما كلمتك بالتومات
أول البارح جني يرطنن
قالن نحنا الخواجات
بسم الله .. مرق حصلت
لقيت لك جعفر زارد البيت بالخواجات
يبقى حداشر وخواجية
ناس البلد الكسرو عليهن
صدو يقلبو في إيديهن
عدمانين من إسم حكيم
ولا خبيراً للمشروع
علماء آثار .. فضلت في آثار
ما خموها الجونا قبلكن
شن خلولنا بلا حجار
الله يصرف الخواجات
بينات جعفر والمحجوب
والمحجوب والخواجات
طقت حجي .. العمدة طفاها
باقي الناس الجات للفرجي
قنبو قيلو شبعو لحوم ..
والخواجة يصور ساكت
ستة خرفن وتيس ما كفن
ستة خرفن في فد يوم
المعدوم أشكال وألوان
أي خدار في اليوم داك في
كملن رف كمين دكان
أول كفو الخواجات
بعدو العمدة وصمد الساقية
ناس المجلس والمشروع
بعدو الطلبة وباقي الناس
حتى الشفع والحروم
ستة خرفن وتيس إنصفن
ستة خرفن في فد يوم
جات من صالح بت كلتوم
تسكت تخبز طول اليوم
لمن حرقت الدولاب
قنبت المسكينة تدعي
الله يصرف الخواجات
غاية الليلة السقا يشولق
واطات الله دي ست رشاها
ما في غنوتاً ما غناها
ما في مدحتاً ما سواها
حمارو صبح لحق أمات طه
سب الدين والأمريكان
جنس بدع
زولك ده يحير
عند الجد كان أده ينقنق
عند الفارغة يشيل ويبعزق
إذكرت كلامك ليا ..
إنو في ناس لاعبين بالدين
وناس لاعبابا الأمريكان
الله يصرف الأمريكان
الله يصرف الصرفيكان
ما خلوني نشدتك منك
كيفن حالك والخرتوم
كيف المصنع والعمال
حالم لسع نفس الحال ؟
وما رقوك سووك باشكاتب ؟
يورينا الله زيادة الراتب
كيف الناس والحالة عموم ؟
والعزابة الكحيانين
سيد البيت عل ما زكاكم
لسع تقعو تقومو براكم ؟
قلبي معاكم
ربي يخدر عود ضرعاتكم
بالي معاك يا الزين ود حامد
بالي هناك والشوق الشوق
خلى شدير الجوف محروق
راجي مطيرة الزين ود حامد
نحنا نصاحاً زي واطاتنا
نحنا نصاح إلا القراص والتجار
والحاصل شتلاتك قبضن
الحملان كبرن بلحيل
العضمين الروكة إنزرعن
اوعك تشفق من تالانا
ولا نبقالك مشغولية
زيك واحد مستورين
وما ناسين المسئولية
هي يا الزين زغرد
بت ام زين جابت لها بت
ستة أولاد حتان البت
المحجوب ينشد من خبرك
شافعو محسب من يومين
التومات طيبات ونصاح
إلا غباش بلحيل آ الزين
راشد كرر .. شهر اتنين
كان ما جيت أنا ما بطهر
الله يبعد العارضي تعال
كان فد دور يدوك يا تعال
كان بالخصم إن شاء الله تعال
وما تتوصى .. وداعة الله
أوعى البشغل والعربات
والحيكومة السمها فاير

أم أولادك ست الدار بت أحمد جابر

ام وسن 26-03-2011 01:24 PM

رد: صالون الشوايقة
 
ست الدار بت أحمد كيفك
جاني جوابك مفتوح شارع
جاني جوابك
وانا بتذكر في ناس راشد والتومات
في الشتلات والحالة عموم
ناس حلتنا التحت .. الفوق
الليهم الله وعيشة السوق
جاني جوابك وانا بتصور
في المشروع وعمايل جعفر
ولما بكيت .. يا ست الدار
أيوة بكيت .. يا ست الدار
لما قريت علماء آثار
علماء إيه يا بت الناس
سواح إيه .. ما عندك راس
ست الدار تتوهدبي ليه
ديلا جماعة السي آي إيه
تعرفي إيه السي آي إيه ؟؟
امريكان في كل مكان
ديل مالين الدنيا ملي
ديل قالين الخلق قلي
باسم الدين والأمريكان
أي عوج مبدي ومختوم
صوتنا هناك وهنا مكتوم
ومافي فرق في الوقت الراهن
بين واشنطن والخرطوم
أنا مأزوم .. مأزوم .. مأزوم
يا خرطوم وينك وينك
يا خرطوم شن شبّ وقلبك وسلبك
حلبك ؟ زنجك ؟ بجتك ؟ نوبتك ؟ عربك ؟
أنا مأزوم .. مأزوم .. مأزوم
يا خرطوم أزمني الصلبك فوق الطلحة الأمريكية
يا خرطوم .. أوه خرطوم .. أوه واشنطوم
طن .. لفتك فجراً يقطع رحطك
ست الدار سامعاني
يا اخيتي ومرتي وامي وأم الكل
أنا بندهلك من شارع الله
فوقي هجير والتحتي بقل
سبي معايا الشردو راجلك
والحرمونا شوية الضل
سبي الحالة العالة علينا
حتى احكيلك بالتفصيل
حاصل الحاصل يا بت أحمد
جاني وفد في المصنع زاير
وكان الوفد ده أمريكاني
لفّ وفات اليوم التاني
جانا مدير المصنع فاير
وشو حمار العمدة العاير
نف المصنع فيهو خساير
وقالوا يخفضوا مئتين عامل
مئتي عامل في فد مرة
مائتين عامل .. مائتين عامل
يبقوا هوامل .. يبقوا هوامل ؟؟
ما يهموش .. الهم المصنع
تفّ قراروا وفات في حالو
مسئولين ونقابيين مافي العارض واللا اترجى

العمال من سمعوا احتجوا .
سيرو موكب صامد وصامت
إتضامنا معاهم سرنا
أب عرام دور عربيتو .. العربية الامريكية
زنقح خلا الموكب ثابت
احتجينا مع الإحتجو
إتكلمنا كلام موضوعي
قلنا المصنع حق الدولة
والعمال أصحاب الحق
هي اللي تقرر والتتولى
هي البتحدد سير المصنع
إيد العامل هي العاد تنتج
ما المكنات الأمريكية
زيت العامل ياهو البطلع
مو المكنات الأمريكية
ودرن الأيدي العمالية
أنضف من لسنات الفجرة
ودين الدقن الشيطانية
ومن كرفتة البنك الدولي
وكل وجوه الراسمالية
وأشرف من ..............
داك الحين المصنع هاج
جات عربات اللات بوليس
فضوا العالم بالكرباج
والبمبان الأمريكاني
شرقت شمس اليوم التاني
كنا حداشر ونوباوية
متهمنا بالتخريب والتحريض والشيوعية
البوليس صاقع شيوعية
وفاكر نفسو بنبذ فينا
هي آ بوليس أمك مسكينة
البوليس عمدني شيوعي
التحقيق طلعني مدان
التحقيق طبعاً تحقيقهم أو تحقيق الأمريكان
اسبوعين عشناهم جوه
اسبوعين زادننا قوة
ست الدار ما تشفقي خالص
ست الدار أنا ياني الزين
ست الدار سامعاني كويس ؟
كل الهم ما يغشى الغم بيتنا وراشد والتومات
وكل الناس الحالهم شاهد
ست الدار الشوق الواحد
لي حلتنا وليكم ليكم
وللإشراق في عينيكم
وكل الناس الزولهم صامد
شوق وسلام .
الزين ود حامد
ردي سريع .. باليد .. باليد
في دورين موعود بي شغلة
لمت لمت .. كان ما لمت أنا جاييكم وما ندمان

ام وسن 31-03-2011 10:16 AM

رد: صالون الشوايقة
 
يا قمرة
************
صديق احمد
*************

يا قمره صبي السنسني الحمـره
شوفي أبوي أنا الراجاهو كلو صبـاح
يا زينوبه أبوكي هو أصلو حالو بـره
لو قاري العلم هو ولاهو سيد خبـره
ومو زول غربه لكن الظروف جابره
مالو إن كان صبر كل الخلوق صابره
والصابرات روابح لـو يجـن قمـاح
***************
هو أصلو متين نساكم يُمة شان يطره
بيتنفـس هـوا ذكراكـم العـطـره
رهيف إحساس حنين قلبـو بالفطـره
نديمو بقت دموعو الديمـه منقطـره
وأصلو إن ما قعد بينكـم ولا بيرتـاح
*****************
جاهو العيد كمان زاد القليب حسـره
ساد العبره حلقـو ونفسـو منكسـره
هو لا لمّ القروش لا حصل المسـره
بلد ما فيها زول مات من عدم كسـره
فراقكم ليها يا أحباب ولا كان صـاح
*************
يـا أمارتـي المـا طاعـت الأمـره
ندماني وبقـت محتـاره فـي أمـره
بعد قسن الـدرادر قصـرن عمـره
الشوق فاض وعماها الحنيـن غمـره
الشوق للبلـد لـي بهجتـه وسمـره
الشوق لي مقيلا ضـم ضـم تمـره
الشوق لي حديثا ضـم ضـو قمـره
الشـوق للبلـد جابريـتـا وكـكـره
كان الشوق يخفف والله يبرى جـراح
*********************
مشتـاق للحسينـاب أسقـه وبكـره
مشتاق للقبيل إتربـوا فـوق حكـره
مشتـاق للدميـري ومويتـه العكـره
مشتاق للجزيـري وتشقـه وهكـره
مشتاق لي قطع بحره ودخول وكـره
مشتاق للأبي يفـارق الفـؤاد ذكـره
مشتاق للعلـى مشغـول دوام فكـره
مشتاق للصباح ديـدن غنـاي شكـره
وياريت كت بقدر أسوي شوقي جناح

أم مصعب 01-04-2011 07:19 PM

رد: صالون الشوايقة
 
خلت ارقى كئيبة وظلام شالا ود ابزيد سريع قام
فيها ارقى اتحيرت حير عليها يبكى صغيرا وكبير
من مشت ما غرد الطير وما سمعنا هديلو الحمام
يا عوض جيتك فى امر وحالى يا اب نيران منو كُر
خلو يا عبدون الككر وسيب غناك لى شمس العصر
الفراق قاسى علينا مر وكيف نسوى دا قالو اقسام
هذا جزء من اخوانيات بين شعراء الشايقية ارجو ان ينال اعجابكم والابيات السابقة من شعر عبد الرحمن التلب

وهذا رد الراحل المقيم عبد الله الخير
تلب امسك حبل الصبر خلو قلبك لا يبقى نى
اصلو ود ابزيد كل يوم من بلدنا يرحل جدى
شن بسويلك عاد انا القبلك الحرمان مر بى
والضنا الهسا عليك زاد من زمان انا زايد على
كم حبيباً شغل الفؤاد فى العيون كان متل الصبى
حل بى توفيق السواد ومافى زول قال كفارة لى
ارقى يا رحمان ودعت قبلو كم قمرة منورة
وكم تحف نادرات سافرن كم فراشة وكم جوهرة
وكم قلوب متلك بالفراق الانين والنوح سهره
شوف عوض عبدون الحروف خلّ من باطنة ظاهره
يا عوض مدرسة الشعر بى جدارة اياك ناظرة
وفى غناك حرف السين بقت فوق بنات جيلها مبطرة
سابك اللى بلد الجليد ودعك ودقّ مغادرة
يا قلب مالك انجرح ولسه ليه جرحك ما بره
اما انا المسكين الظروف غرزت فيّ اظافره
وبى غناى لى شتل الجروف والجناين وازاهره
اسألوا الدرويش عن صديق عمرو كم جمرات عاصره
خلو يحكيلكم عن حياة النجيفى الهو معاصره
الككر يا رحمان زمان ضاع مع العشاق شاعره
ما نفع تغريدو الحزين ما نفع صدق مشاعره
جننو البتوفيق رحل هام ورا القام بالباخره
خلا دنياهو فرندقس ما عرف اوله وآخره
ارقى يا رحمان فى السماح مافى بلداً بتجاكره
الله مديها سماحة صاح من كروها ولى تكره
اصلو ود ابزيد معترف بى جريمتو ومو ناكره
كلو جور القال سفروها وقام قطع ليها التذكرة

التحايا لصاحبة الصالون بهذة المشاركة البسيطة ارجو ان تتقبلي مروري
علي فكرة هذه الاخوانيات بلغت اكثر من 110 قصيدة ساورد منها البعض وغداً ألقاك ان شاء الله

أم مصعب 03-04-2011 10:45 AM

رد: صالون الشوايقة
 
سمع الشاعر المبدع حاتم حسن الدابى قصيدة الشاعر
عبد الله محمد خير رد ليهو يقول :
عبدو كان طوعت الحروف رتب الكلمات واوزنه
انت ياكا استاذ الشعر والشمال بيك نأمنه
قولك الموزون الرصين كل خلق الله مجننه
بيهو صديق احمد صدح الحجار صخرة يلينه
الا يا عبدو سمع كلام جانى تلهجبو الالسنه
قت فى ارقى جمال فريد مافى بلداً بتقارنه
بيك ود الدابى ان سمع تبقى مشكلتك مزمنة
ولا يصل لى حمد سعيد والسرير الماهن هنا
القرير جوهرة الشمال وانت داريها محاسنه
وفى المقام زى ذات العماد هيبته وعزة ساكنه
فيها اسأل الرواسى الزمان بالاسم ليهم عينه
فيها كان ترسى مراكبن خايفى لى التيار يوهنه
خضرته الزينت الضفاف زى عيون ظبية على سنه
الجمال ما محصور اكيد ولا محلاتو معينه
بدرى فى بير سام بن نوح يوسف اتوسد داكنه
الشمس تشرق فى القرير ولما تغرب تستاذنه
خايفى تفوت الخضار الا بس حكمة ربنا
مرتعة الريان الخصيب القلوب كلها يرهنه

* حمد سعيد هو الشاعر الكبير محمد سعيد دفع الله

ام وسن 03-04-2011 03:50 PM

رد: صالون الشوايقة
 
ام مصعب يعطيك العافية نورتي البوست واصلي في ابداعك

أم مصعب 08-04-2011 09:20 PM

رد: صالون الشوايقة
 
نواصل احبتي مساجلات شعراء الشايقية ارجو ان ينال رضاكم مع تحياتى لكم ولصاحبة الصالون

سمع الشاعر / سليمان محمد نور وهو من منطقة القرير قصيدة الشاعر
الراحل المقيم / عبد الله محمد خير رد ليهو بقصيدة يقول فيها :
عبدو كان طوعت الحروف رتبا وطلع حقنا
انت عبد الله الزمان انت ماك فينا ومننا
عبدو شوف النيل رايده عظما وعندها انحنى
قال هويت والله القرير التميرات ومواطنه
الا يا حبان شن اقول الجبر ساقنى انا من هنا
السموم ان جات القرير تنقلب نسمة تهجنه
القرير اية من الجمال وحبو شريان فى دمنا
انت اسأل قمر السبوع هو البوريك محاسنه
كان يقولك بلدو القرير وناوى يطلع طول السنة
والشمس تشرق فى القرير ولما تغرب تستاذنه
ماها راضى تفارق الحال الا بس حكمة ربنا
عبدو كان طوعت الحروف قول كلامك وسمعنى انا
ابونا ادم خلّف كتير فى القرير ولد احسن جنا
ولو تراجع النسب القبيل تلقى يوسف ود عمنا

Fawzi Salih Wahbi 11-04-2011 10:15 AM

رد: صالون الشوايقة
 


بجيك قاطع مسافات العشم ...

( عبدالرحيم ارقى )

باكر بجيك قاطع مسافات العشم
شايل معاي هوى العيون
آمالي في أجمل نغم
باكر بجيك قاطع مسافات العشم

بجيك من سكـــة القلب العشق ذاتك سنين
بجيك من صفحة الماضي الكان قاسي وضنين
خايف يكون زيف المدن غير أصالتك والحنين
جايك من ليل العـذاب ارجيني بالصبح المبين

فُتيني للليل الطــويل يرميني في حضن الآلم
سبتيني بين شبح الظنون وأحزان بتنبع من وهم
ارجيني فوق أرض الصبر جايك من زمناً سجم
لا فيهو للأفــراح طريق ولا فيهو للأيام طعم

باكر بجيك بي لعنة الريد المـــــلك قلبي الجريح
بي حال بيغني عن السؤال ما بوصفو الخاطر الفصيح
خايف يقصر بي العمــــر تحملني من الدنيا ريح
لو كان مُقدر إني اروح سوي لي في روحك ضريح


سافرتي مـــا خليتي خيط ابراه للمرسى الجديد
سافرتي مـــا خليتي لي غير ذكرة الزمن البعيد
علمتي روحي الإنشراح علمتي قلبي يحــب شديد
فجاءة اختفيتي من الدروب وأخفيتي كل زمني السعيد


لكني لي أحســـاس يسوق خطواتي لأجمل عيون
باكر بتلقي خطاي معــاك تتمشى ما بين الغصون
ما تقولي لي وصلت كيف مــن دل قلبك يا حنون
أنا قلبي أصبح ليك مكان يا الناسية إني انا ليك كون

باكر بنكشف الضباب القـــاك في فرح الشباب
تقشي في دمع الفـــراق وتزيلي في أثر العذاب
بكرة المسافـات تجتمع وتلم قلوب يوم عيدها آب
ويعود شباب الفي هواك يا حلوة بي أحزانو شاب


أم مصعب 11-04-2011 10:35 AM

رد: صالون الشوايقة
 

سمع الشاعر الكبير / على الخضر وهو من منطقة تنقسى رد الاستاذ / حاتم
للاستاذ المرحوم / عبد الله محمد خير رد ليهو بقصيدة بقول فيها :
عبدو عندو خيال للحروف قبل ما تتقال يوزنه
وفى اللسان لحنها ينطبع ما بيتوه البيلحنه
حت ساس الغنا من زمان بى رصين القافية وبنا
وبعدو جات شعراء الشمال تبنى فوق حد ساسو البنا
قولو فى التوفيق كان حروف تحكى عن لحظات محزنه
وعن هيام القلب الصبح بين لهيب الشوق والضنا
وقصدو كان لوعات الفراق بى لسان الحال يعلنه
سلوى فى الايام لى قليبا عاش متيم فاقد هنا
ما حصل سباها القرير حتى فى اشعارو وغنا
وما نطق لو كان بالمزاح هانه بى كلمة محاسنه
قت جوهرة ضاوية الشمال زى عيون ظبية على سنه
وطاف خيالك يصف الجمال قت صدر النيل حاضنه
كيف حكمت عليهو الشمال حتى جوهرتو تعينه
وفى الحكم تنحاز للقرير واللا شان اياك ساكنه
اصلو عند الناس مهما كان طال شقاها وزادت عنا
ورغم كل قساوة الظروف يبقى غالى عزيز موطنه
ياما كم قرى فى الشمال تسحر الالباب فاتنه
وتستبيح حرمات الجمال لى عقول الناس تسجنه
طوف لى حد حلفا وتعال لو يدوم ترحالك سنة
تلقى تنقسى بهجة وجمال ما بيحيطو حروف الغنا
تعرف انها ذات العماد الوصف خضرته ربنا
وبيها وصى النيل من قديم بى حنانو النيل حاضنه
وعبدو ما بتهددو بالسرير وما بتكون مشكلة مزمنة
للخلق شيطان الشعر يمشى بى تصريح مننا
نحن يانا منابع الحروف ومن زمان يانا اهل الغنا
وورثة الكلمات جيل فى جيل لا نهاية الكون عندنا
حقو للستاذ كان يكون الكلام بى ذوق واعتنا
والادب سلطان الحديث يحكم الفنان من جنا
لو مشيت قدامو اعتذر ننسى للمشكلة وندفنه
ولو كمان طاوعت الخيال يبقى حد مشوار
ونواصل معكم مشوار الاخوانيات ان شاء الله

أم مصعب 14-04-2011 04:24 PM

رد: صالون الشوايقة
 
نواصل ابداع شعراء الشايقية
هذا رد الشاعر على الخضر بقصيدة يقول فيها :
قلنا نار الفتنة انطفت تانى جيت دايرة تستعر
وجيت كمان ماسكلك درب قاسى ما بيتجارى ووعر
الكلام شتتو شتيت بان حقد مكتوم منستر
والحروف لويته لوى خات الكلمات تتنكر
جات ركيكة وفاقدة مضمون يسمعه اللى ذوق يفتقر
لا نغم لا بيطرب حواس غير شتيمة والفاظاً قزر
كان تخلى لسانك عفيف شان تخاطب الذوق والفكر
وتنتقى الكلمات الفصاح حتى داب ترتاد الشعر
انت قصدك دايرنى ارد شان يكون لك سيرة وذكر
حتى لو بالخير واللا شر المهم الناس تنذكر
كان دا ممكن لو جيت عديل فوق خطاوى الزول الخضر
كنت اقولك شعراً افتخار وما قصدت انا يوم افتخر
شعرى ينبع فيضا يسيل يطفى هم الراى الكتر
ماهو نوع الشعر الرخيص لا يعجب الناس لا سعر
فى البيسوى وما بيسوى يتقال ما مهم ربحان او خسر
المهم ترقص الحروف بالغصب ومرات تتبخر
يبقى بخت الناس الطرش واليقيف مجنون او سكر
الا عاد ما دام جيت براك ودون تحس ذليت وعتر
استعد لا تجر لا وراك او تفكر يوم تعتذر
شان منابع الغنا مننا فوق خلايق الله بتنهمر
لينا فى الاشعار ساس عميق مافى يوم يتقاس بالمتر
وفى بحرنا ان داير تعوم تلحق القبالك ودر
قلت ود الدابى معروف الامين العارف الخضر
قصدك انو ابوى مجهول وسيرتو باقى سر
يكفى انو ابوى معروف بى شى غير الغنا والشعر
يعنى نحن حوينا اوصاف الشعر بينهم يتذكر
يعرفوه الناس ويفرزو الفضة من التبر
الا ما اتأنيت ما سأل اندفعت ابيت تنتظر
وليهو فى الاشعار باع طويل وشعرو فى البلدان منتشر
بى غناهو وشعرو الرصين سارت الركبان لا مصر
بكتب الاشعار للعرف شعرى يرفع قيمة الحبر
صحبة الصياد للكلب يقبله الصياد منجبر
ماهو خوة وإلفاً شديد خلى عاد البينهم عمر
ما بيفيد معرفتك لبيب بل دا باب معرفتاً مضر
واليقول يوم يعرفك يبقى خل مقامو وصغر
كل زول بالفيهو معروف ما بيخلطو الذم بالشكر
وفى السباع العز بالضباع الكديس والليث والنمر
قلت بى تأهيلى افتخر وانت فى تعليمى احتر
شان قيرت سيرتى انا فى الكتاب انعدمت وراسك خمر
العلم ما قريتو افتخار بل ذخيرة وبيهو استجر
الكلام يا احمد كتيييير يترى كل ما اقول اختصر
القى جواى فاض وسال وفى اللسان القول مستمر
كا ما اقول اغفر لك خطاك رغم انو هى ما بتتغفر
الصفا البيناتنا كان ود من اساسو اتهز وعكر
وشان لسانى عفيف ليك شفع هو زى العشا والشفع
ورغم لنو يكلف كتير لا عندنا عادة وسبرد




سمع الشاعر / نور الدين اليمنى وهو من منطقة القرير كلمات الشاعر / على الخضر لى
الشاعر حاتم حسن الدابى رد ليهو يقول :
ابدأ بسم الله واقول فوق قريرنا اجر الغنا
والقوافى تسيل سلسبيل ما بترجى البيلحنه
القرير صح بلد الجمال موطن الاشعار والغنا
القرير النيل حاضنه والنخيل والسبيط الشال وانتنى
والفواكه جنة عدن والحسان الحور عندنا
اسأل التاريخ عنها والرواويس اهل الغنا
يحكو ليك عنها اغنيات شالته النسمات دندنه
رقصت بها لوبى الجروف فى الشمال كلو هنا وهنا
شالت اسم الارض القرير الخضار والنيل والسنا
ما بتلقاله يمين طبيق انت لو جيت تقارنه
القرير ذات العماد سايلة اشراقة محاسنة
ماخدة من سبأ ملكوت جمال فوقه عرش الشعر اتبنى
وانتشر منها للشمال عطر الساحات زينه
نفسى لو ماها من القرير والقرير لو ما كان موطنه
برضو تتمنى تعيش هناك والقرير يصبح مسكنه
شن يجيب تنقسى ليها عاد ام سماحة قدر الغنا
ما القرير اصلو براهو كوم لوحة بالخضرة ملونه
فوقا ود الدابى غنى وأدى سر المهنة الجنا
شابى ود الوز دار يعوم خبرتو المن كم كم سنة
عبدو استاذ ما فيهو قول الحروف عندو ملبنة
وحاتم اداهو مقامو صاح ما هو حاتم بس كلنا
وانت لو قصدك اعتذار ما بيفتح باب الانا
وينفلت شيطان الشعر يبدأ يدرح فوق حينا
القرير ان قبل عليك يا على العيشى تكجنه
وتبقى فى دار تتحل كيف وانت حاس لى اجل دنا
مهما كان قصدك يا على وانفعلت ورديت انا
اصلى متفرغ لك عديل مانى داير لى مهادنة
ليك فاتح باب الجحيم حتى واطاتو ممارنة
ويانى تمساح بحر الشعر اب قرحة متمكنة
والحروف الليلة كاجنيب والشعر يبقى مباطنة

قمر خضر 23-04-2011 04:40 PM

رد: صالون الشوايقة
 
الشاعر: الفاتح إبراهيم بشير


الطمبور صديقنا وعزنا وملجانا

وكتين السنين تفتح بوابة أحزانا

مما قمنا نسمع فيهو لا ملينا لا ملانا

زي إبل الرحيل شايلي السٌقا وعطشانه

أوتارو الحنيني تملِّي عايشي معانا

في الريف والحضر ومحل ما تمشي خطانا

الله لو بشيشي تداعبو إيد فنانة

تتراقص جميع الدنيا بي أركانا

لو قلبك حجر وغنانا شايفو رطانه

أول ما يرن تلقاك طربتا معانا

إحساسك يذوب قامتك تميل طربانه

زي مرّ النسيم وكتين يداعب البانه

الطمبور سماحتو القمرة مالي سمانا

الليل والسكون والرملة كالمرجانه

نتلملم نكون في شلة زاهية الوانا

نضحك ننبسط لما الصباح يلقانا

وفي رواية اخرى معروف من قديم

انو الجمال نسبي وللموجب دوام لابد من سلبي

لكن نتفق رسمي وكمان شعبي

الطمبور علاج لكل مرض عصبي

سبحان رب العباد ربي

خلا قدح حراز دبكر أصيل عربي

ومكسي جلد بقر يلصف تقول دهبي

فوقو تلات عصي واقفات بلا شعبي

وخمسه سلوك سونان موزوني بالنسبي

لو رنت تذوب ترقص جبال كجبي

والبركل يمور يتحول العقبي

ولو ما كت بخاف والناس تشيل كضبي

كنت بقول يرن تنحلا لوكربي

وأنداح الوئام بين الخلق يدبي

والبوسني الجريح يستأمن الصربي

وينشر الفرح من راجا لاوربي

قمر خضر 23-04-2011 04:46 PM

رد: صالون الشوايقة
 


رثاء يس عبدالعظيم

للشاعر ابراهيم ابنعوف



إن كان ما الأجل بدرياتكتب في اللوح
أو كان النفوس تتفدي , روح .. بي روح
ما كان ... مت ياغريد
بلابل الدوح
وآحي .. وآ وحيح قلباً عليك مجروح
***
بنوت الشعر الليلة ليش
... ساكتات
شبن في صدور كل الغناة .. وراواة
هينن الرماد كبن علي
القافيات
أبكن ومنحن ونوحن مع النايحات
***
أثكلن الجنا الماب يتولد
لامات
ارثن روعة الفن البملك الذات
في (ليل الغلابه وحمتو والشافعات
يلا
أها سوون (الحي ووب) عريسكن مات
وماتت طيبة في الوجه التملي صبوح
أحي وآ
وحيحي قلباً عليك مجروح
***
قولن ليه يا النجم السطع في سماك
غبت بلا خبر
شن شفت في دنياك
صغير وما بقيت مالو القبير ضماك
لا شفت الجديد لا نحنا
.. سيرناك
وآ أسفي الشديد واسفاً عليه صباك
يا البكيت قلوب كانت عزاها
غناك
قطع كبد أبوك وأمل .. الراجاك
واخواتك يجرن في المناحه نباك
واخوانك
منو الفيهم عليك ما بنوح
أحي , وآ وحيح قلباً عليك مجروح
***
كنت إنسان
ملايكي وماك زول شرير
وصدرك كان يصفي الشر يمسك الخير
يا شيال هموم الناس
كبير وصغير
عالجت المريض شلت الكسيح وعزير
وكنت علي حساب نفسك تجامل
الغير
الا الدنيا صح غشاشه ما دار خير
وسمح العشره ياهو الفيها عمرو
قصير
والطب والعلاج من الأجل .. ما بجير
وزايله الدنيا يالفوق النعش
مطروح
أحي , وآ وحيح قلباً عليك مجروح

***
ما كان قصدي أجامل فيك يوم
الشين
قصدي القاك عريس بين العديل والزين
قصدي تهزو سوطك والجنيات
راكزين
قصدي غنا البنات والسيرة .. لي يس
وجات الفرحه فوق عتب الفريق
عرزين
كربه وأبكر العفاض شمال ويمين
راجين يوم جديدك وكلهم دايرين
يردولك
جمايلك يا الوليد الزين
وياريت كنت عشت والأماني تروح
أحي , وآ وحيح قلباً
عليك مجروح
***
كيفن (ياالرميله) شمالنا .. ما يحزن
بايني احزانو فوق نخل
انتني .. ودندن
في النيل في الجروف في الصوبن عدن
فوق وجه البنيات الملن
.. وصدن
في الجنيات في السلك الوقف ما رن
فوق قيزان رمالو الهيلن وكبن
حزين
اداك وليدو المافي ليهو وزن
ويا بخت التراب الضم كل الفن
وضم اجمل رسالة اجمل
متون وشروح
أحي وآ وحيح قلباً عليك مجروح

***
كيف حال الأهل وحال العشيرة
عموم
وكيف حال أمك التفطر عليك وتصوم
وكيف حال الصحاب حين سمعوا خبر
الشوم
شطاب , والعوض ود أحمد المكلوم
ناس توفيق كذا الزين لا ولد توم
حميد
والحبيب جاد ونور القوم
شيخ ود بادي في وصف الكرام مفهوم
وكيف حالي الغلبني
ارثاك مجافي النوم
أبكي وتبكي إرقي واوسلي منصوركتي , سافل ابدوم
كونو اصعب
فراقك من فراق الروح
أحي , وآ وحيح قلباً عليك مجروح
***
الموت اصلو حق
, إلا المصيبه كمان
ما قادرين نصدق يوم رحيلك كان
معقول يرحل البيناتنا كان
رحمن ؟
معقول يسكت الصداح علي الأفنان ؟
معقول يرحل الطرب الغشي الوجدان
؟
وتتكسر الربابه وتصمت الألحان ؟
كان ما أمر الله كان قلنا الملك وهمان
؟
ودي أول مره مات الفن مع الفنان
آ ياعرب الحجاز عزونا في حسان
نحنا
اليوم فقدنا الطيب الإنسان
وفقدنا ليه لا بيكون ولا قد .. كان
ويا هول القدر
في سواد عيون النوح
أحي وآ وحيح قلباً عليك مجروح
***
سلام الله عليك يسن
مع الأخيار
سلاماً يوم جيت شرفت هادي الدار
وسلاماً يوم مت ويوم نعشك
سار
وسلاماً يوم تقوم وتبعث مع الأبرار
وعليك سلامنا بالآلاف من
التكرار
سلام أرق من نسماً من الأسحار
وأزكي وأحلي من نفحة شذي الأزهار
ما
طلع الصباح ... ما غنت الأطيار
وما غرد علي سفح الروابي كنار
وما بوبا
القمر وإتجمعوا السمار
وما صدحت لحون وما قيلت الأشعار
وما عزف الرباب
واترنمت أوتار
ولا يوم النشور يومة تعود الروح
أحي وآ وحيح قلباً عليك مجروح

***
يس جاك غريب أغفرلو يا مولاي
غفران ذلة العبد الدوام نساي
سحاب
الرحمه فوق قبرو اليكب بكاي
وأنزلو منزلة عبداً تقي وصلاي
وعوضو في شبابو
الجنه يا عطــاي
فوق ميمونه يسرح فيها جاي لآجاي
وأكرمو بي (حواري) وقولو هذا
جزاي
وزوجو من حسان , كان للحسان غناي
ات ياك الكريم ال للضعيف
.. رتاي
وياك الباقي ازل وكل الخليقه تروح
أحي وآ وحيح قلباً عليك مجروح
.

قمر خضر 25-04-2011 01:34 PM

رد: صالون الشوايقة
 
ساقتنا الظروف
كلمات: السر عثمان الطيب

ساقتنا الظروف يا صاح لـي دار العـذاب والغربـه
فارقنا القرير نتباكـي احكـام الزمـن صـح صعبـه
من شفع صغار يـا دوبنـا ماسكيـن الشطـر نتربـي
مـا فتنـا البلـد بالمـرة حبهـا قـام معانـا وشـب
بـي فـوق البحـر نتجـارا عاشرنـا وبقينـا احبـه
حارسين الجبابيد ديمه نشـرب مـن مياهـو العذبـه
نتغاتت كتير في بعضنـا دسينـا الطعـم فـي العلبـه
مـره نلفـو فـي الأشميقـه بالكشونـه تلقـى مخبـا
نحلف للكمـل صارقيلـو مننـا مـا يضـوق الحبـه
نرجع تاني ننسـى القلنـا نديهـو وتعـود الصحبـه
والطاهر جزيرتو حليلـه نسامـا العليـل فـاح هـب
يلا عليها قـوم يـا رامـي لـو بينـا بيـدور القبـه
آه أنـا حليـل رملاتـا منهـا كــم نشـيـد قـبـه
نرميها ونقـول لبعضنـا سجمانـي ودي فوقـا التبـه
نرجـع للتقـا ونتلـم نسـأل عـن صديقنـا الـغـبَّ
ندفرلـو الصغيـر فينـا يتـأكـد يـعـرف السـبـه
يمشيلو ويجيبو ونبدا كـم فـي الخـط نصيـح نتنبـأ
ماهـن ستـه لـع والله ياتانيهـو عـيـد الحسـبـه
ماهن سبعة لـع والله ماهـن تسعـة جبـت الكضبـه
فجأة يقولو شـد نتجـارا واليركـب تكونلـو الغلبـه
وينو شليـل حليـل فتيشـو ماكنـا بنخـاف أو نأبـه
نتحـاوم حفايـا نكوسـو يدفعنـا الحمـاس والرغبـه
نرجع لامتيـن لقريرنـا يفـرح عـاد قليبنـا الحـبَّ
نيلووروض نخيلو الزاهي حاضناهو الأراضى الخصبه

قمر خضر 25-04-2011 01:39 PM

رد: صالون الشوايقة
 
أنا المعجب
كلمات عبد الله محمد خير

أنا المشتاق أشوف عينيك
كل صباح واتعذب
وأسمع من شفاهك ديل
ألذ نغم برأى أطرب
وتلوح لى فى صفاء عينيك
بحور من ريد ... أدور اشرب
ومرة اتوه ... اقيف مشدوه
اقول يا عـــبدو أتــــادب
زمـــــــانك فــــــات ..
والــــريد فى قليبك مات
ليه فوق جـــمرو تتقلب
واشيل مـــــن عمــــرى
عشــــرة ســـــنين
اقول يمكن يكون انسب
وأدلى دلوى مع الخطاب
مع العشاق يجوز اكسب
وأعاين لى عيونك يمكن القى سعادة
القـــــى غضــــب ...
واشيل فوق راسى هم الدنيا
فوق افكارى يترسب
قلبى رهيف
ما خاض زى حروبك ديل ولا جرب
وفجأة يعود صوابى الغاب
أشوف انا نفسى جنبك زى وليد يلعب
بيجرى وراء سراب ورهاب
بعيييد...................لليلة ما قرب
وهل مـعقول ..!!!
يكون فى وصول ؟
متين يا رب ..؟
ما تصارحيه ........ خافى عليهو
قولى ليهو لا يتعب
انا المعجب
انا الولهان ولى سنين
بعانى من الصعاب أصعب
وقالوا على كبرت خلاص
ولسع ماقدرت خطب
انا المعجب
انا المشتاق .......
انا الطوالى بترقب
انا التائه
وعيونى بلاك ما شافت
يمين كوكب
شوية ريده
ليه يا صيده
ما دا انا المتيم تب


الساعة الآن 12:23 PM.

Powered by vBulletin® Version 3.8.7
Copyright ©2000 - 2014, Jelsoft Enterprises Ltd.
تنبيـه هـام : جميع الآراء والتعليقات المطروحة بأسماء حقيقية أو مستعارة تمثل وجهة نظر كاتبها وليس بالضرورة وجهة نظر الموقع